Hospital orguyoso cu 13 graduado den enfermeria specializa

ORANJESTAD  -Un total di diestres studiante di HOH Academy a haya nan diploma diabierna ultimo. No por a keda sin celebra un momento asina special y a bira creativo. E team di HOH Academy a scoge pa bay Drive Inn Aruba.  Tur graduado a decora nan auto y hunto cu nan famia a goza di popcorn y bebida refrescante durante un video graba specialmente pa nan sigui pa e otorgamento di diploma. 

A celebra cu dos grupo di graduado a ricibi nan diploma pa enfermero specializa den Dialisis y tambe enfermero specializa den obstetrie(maternidad). Un estudio realiza pa HOH Academy hunto cu VU Amsterdam cu un duracion di mas o menos 1,5 aña. Sigur di aplaudi ta e motibo cu meymey di un pandemia cu ta exigi asina hopi di e dunadonan di cuido nan a pusha y a termina nan studio den e tempo premira. 

Ta un momento importante p’e isla mirando e scarcedad cu tin den dunadonan di cuido. 

Jacco Vroegop, presidente di e directiva di Dr. Horacio E. Oduber Hospital, a duna di conoce cu e setup na Drive-Inn tabata ideal specialmente durante e pandemia aki. Den su speech den e video cu e la dedica na e graduadonan el a bisa cu bo por cambia mundo cu conocemento y alaves e pone enfasis riba amor pa bo coleganan y bo trabou y sigur pa bo pashentnan. 

E studio aki ta duna pa un team magnifico di personanan di tanto Aruba como Hulanda cu a hinca hopi energia y tempo pa asina guia nos studiantenan. Directiva, staf y tur colega di Hospital kier manda palabra di felicitacion na tur graduado y ta desea nan hopi exito den nan carera como enfermero specializa.