Evelyn Wever: Minister Hooyboer mester contesta pregunta riba compania di seguro

ORANJESTAD - Lider di MEP Evelyn Wever-Croes a anuncia cu hasiendo uso di su derecho constitucional a manda hasi minister encarga cu enseñansa algun pregunta relaciona cu e dudanan rond di e seguro pa studiante na Hulanda. Por lesa e preguntanan aki. “Ya pa 3 siman caba ta saliendo cantidad di insinuacionnan y acusacionnan serio den direccion di e minister, pa e forma con el’ a atende cu e asunto di cambio di seguro di studiantenan na Hulanda. E forma con e destaho a wordo ehecuta a wordo cuestiona seriamente, pero mas aun, e minister su propio declaracion prome cu fin di aña a wordo bari for di mesa, pasobra e minister a declara hopi detayes cu no ta cuadra cu berdad.

Locual ta hasi e situacion mas serio ta cu e minister a scohe pa keda keto segun Wever, y no reacciona, dunando asina e impresion cu e acusacionnan ta berdad. “Pesey, hasiendo uso di nos derecho constitucional mi a dirigi 10 pregunta na e minister encarga cu enseñansa y puntre tocante e dudanan tras di tur esaki” Wever ta bisa.

E minister a declara cu e compania cu a gana e bidding, InsureToStudy BV, tin amplio experiencia riba e tereno aki y ya tin 28 mil cliente. Pero investigacion publica den medionan di comunicacion a mustra cu esaki ta un mentira, mirando cu e compania a wordo incorpora despues cu e bidding a wordo anuncia, mientras cu un luna despues ainda su website no tabata cla ainda, y nan no tabata tin un linea di telefon duro, sino solamente un celular. “ E minister no por kere cu e por keda keto, y ‘get away’ cu esaki, sin duna cuenta. Pesey nos a mand’e e carta y nos a pidi ‘e pa contesta nos mas pronto cu ta posible.

"Si e minister no contesta nos carta den tempo corto manera nos a pidi, nos lo pidi Ministerio Publico pa conduci un investigacion den e caso aki, y especialmente ki rol Michelle Hooijboer-Winklaar y/of su esposo a hunga den e caso aki" Wever ta finalisa bisando.