Tevreden: Fraccion y ministernan di MEP ta sostene Ady Thijsen den su decision pa anula mocion di desconfianza

ORANJESTAD - Partido MEP ta sostene e decision di su miembro y alavez presidente di Parlamento sr Ady Thijsen,  pa a scoge pa interes general, y pa trece trankilidad den comunidad. Asina e presidente di e partido geel sr Hendrik Tevreden a clarifica pa noticiacla diaranzon atardi. E ta referi na e informacion di algun ora prome di sr Thijsen di a tuma e paso pa e mocion di desconfianza contra awor ex minister Marisol Lopez Tromo por a wordo declara nulo. Aki segun sr Tevreden, e partido ta haya cu e ta e paso corecto pa tuma. “Esaki no ta nifica si cu e desconfianza den e ex minister Lopez-Tromp ta ser elimina. E ta keda valido, pero mirando cu gobierno mes a pidi pa retire e mocion ta superfluo” sr Tevreden a sigui bisa. 

TRANKILIDAD 

Aruba mester di trankilidad aworaki segun sr Tevreden.” Manera Thijsen a splica awe, pa loke ta e interpretacion di e ley cu e a aplica, nada no a cambia. Y fraccion ta comparti su opinion den esaki tambe” e presidente di e partido a sigura e portal aki. 

SOSTEN DI MINISTER

“Tur Minister ta sostene Thijsen den su interpretacion y decision tuma awe, pa laga interes general prevalece riba su interpretacion” sr Tevreden a sigui bisa tambe. Ora cu a puntre si e ta referi na tur minister di e gabinete, sr Tevreden a clarifica:” Bo a hasi mi un pregunta como presidente di MEP. Kiermen ami por papia pa MEP”.