Presidente di Parlamento a hala mocion di desconfianza aden

ORANJESTAD – Algo menos cu 2 siman despues cu el a aproba e mocion di desconfianza contra awor ex minister Marisol Lopez Tromp, presidente di Parlamento sr Ady Thijsen diaranson mainta a anuncia den un conferencia di prensa, cu e ta hala e mocion ey (y e otro dosnan) aden y ta declara nan nulo. Mes momento e ta bisa si cu e ta para riba su interpretacion personal, pero ta hala e mocionan aden, pa ‘interes general’ y pa evita discusion den comunidad. Discusion si e tabata valido of no, cu a keda colga den laira. Mientras cu noticiacla no tabata invita pa e conferencia, e pregunta cardinal, di pakico diripiente e cambio aki, no a keda contesta, sino solamente cu el a haci’e, pues, pa interes general. 

DISCUSION DEN COMUNIDAD

Segun sr Thijsen, tin cuestion di interpretacion riba e mocion(nan) den comunidad. Y mes momento e ta admiti cu ta prome biaha cu e ta haye den un situacion asina, den sentido cu ta aplica articulo 27 di reglamento di orden den e momentonan di votacion. “E la trece hopi discusion y di intrankilidad den e comunidad. E la ‘touch’ e estado di derecho” sr Thijsen a sigui bisa. Asina mes e ta para riba su interpretacion cu e tin, pero e ta respeta otro opinion. “Mirando e situacion cu nos ta aden. Mirando e intrankilidad, mi a tuma un decision” sr Thijsen a bisa, pa despues anuncia cu e ta hala e mocion di desconfianza aden y declara esaki nulo. “Nos mester tin stabilidad y trankilidad den nos comunidad. Mi ta laga mi decision un banda, y escohe pa interpretacion cu ta wordo duna na articulo 27 cu ta aplicabel tur momento cual sea e circumstancianan” sr Thijsen a sigui bisa. “E ‘rechtszekerheid’ den instituto di Parlamento mester wordo salvaguardia prome cu tur cos” e presidente di Parlamento a sigui bisa. 

LOKE NO A CAMBIA

Loke cu no a cambia, fuera di cu e ta para riba cu su interpretacion ta keda manera e ta pe, e denuncia haci na ministerio publico pa aangifte falso ta keda, y tambe e investigacion di menaza contra dje. Esey no ta wordo hala aden y lo sigui cana su caminda. Segun e presidente di Parlamento,  e ta bisa esey ‘pa no tin discusion riba esey’.

SOSTEN DI PARTIDO

Por corda tambe cu despues cu sr Thijsen a tuma su decision anterior di declara e mocion nan en cuestion valido, algun dia despues den un reunion di Partijraad, e partido completo a para tras di dje, y sostene 100%, esta e decision cu e la tuma. E hecho cu awor e decision ey ta wordo hala aden, no ta conoci ainda pa e portal aki si e partido tambe lo hala nan sosten aden, of ta keda para ariba si nan ta keda sostene e decision, basa riba su interpretacion, cu el a bisa (esta sr Thijsen), di lo no cambia esey si.