Zahira Zaandam ta bira secretaria general di UNESCO

ORANJESTAD - Zahira Zaandam a keda nombra cu Secretaria General di Aruba su Comision Nacional pa UNESCO. Esaki a sosode despues di a revisa e diferente solicitudnan cu a drenta pa e posicion aki, despues cu Jimmy Oduber, kende a ocupa e posicion aki dignamente representando nos isla pa varios aña, a baha cu pension. Ta trata di un posicion hopi importante pa loke ta e aspecto cultural entre otro pa loke ta trata e parti di experticio, mercadeo y financiamento di diferente proyecto. Zahira Zaandam no ta un persona desconoci den e ramo di cultura di nos isla. E tabata miembro di e Management Team di Departamento di Cultura y despues di esaki el a bira e persona cu a dirigi Museo Historico durante e ultimo 2 aña. El a indica cu su nombracion no ta solamente un reto nobo cu e kier dedica su mes na dje, e organisacion di UNESCO riba su mes ta uno cu ta duna espacio pa e por traha riba terenonan cu ta hopi yega na su curazon y cu e tin pasion pe; esta cultura, maneho duradero, educacion y ciencia y comunicacion.