Aruba no ta cla pa firma cu Hulanda diabierna durante RMR

ORANJESTAD - Contrario cu Corsou, Aruba parce di no ta cla ainda pa firma e acuerdo cu Hulanda diabierna awor durante e proximo Rijks Ministeraad (RMR), aunke cu e dos paisnan ta hopi cerca di otro. Asina fuentenan cerca di e proceso, ta bisa e portal aki. Mientrastanto e portal di Corsou AD ta raporta cu RMR lo trata e acuerdo cu Corsou y posiblemente aproba e pakete di fianza pa e di tres tranche. Nan ta cita prome minister di Corsou Eugene Rhuggenaath cu lo a confirma esaki cu e portal.  Pa loke ta Aruba mientrastanto, ta parce cu pa e proximo RMR (13 di November 2020), un acuerdo lo ta posibel.  

PAKICO ARUBA AINDA NO

A compronde cu un di e problemanan cu tin e proceso pa Aruba wanta, ta e suma cu Hulanda tin cu duna Aruba te cu fin di e aña aki. E problema pa esaki ta e calculacion cu e colegio di supervision CAFT tin cu haci y presenta. Y esaki no ta cla ainda. De hecho, a compronde cu na comienzo di November, CAFT lo presenta e calculacion, pero esaki ta bin net despues di e proximo RMR (di dia 30 di October). Y tanten cu esaki no ta cla, Aruba no por firma cu Hulanda. 

TRES PUNTO

Manera ta conoci, Aruba a menciona tres punto cu e ta pendiente pa haya confirmacion di Hulanda pa acepta, of pa mas bien ‘concretiza’ pa por firma e documento final. Entre nan, tin e suma di e prestamo y e autoridad di e entidad. Unabez cu esaki keda concretiza pa Hulanda, Aruba lo ta cla pa firma. Pero Aruba no por a duna un fecha cuanto tempo esaki lo dura prome cu ta asina leu.