Gobierno no por confirma cu Leopoldo Lopez tabata na Aruba recientemente

ORANJESTAD – No obstante cu por lo menos 5 medio internacional a raporta e rumor y /of duna indicacion cu e activista politico opositor Venezolano Leopoldo Lopez tabata na Aruba, Gobierno di Aruba dialuna no por confirma esaki. “Asina leu cu nos sa, e no a pisa tera di Aruba den e dianan cu a wordo menciona” premier Wever Croes a bisa dialuna anochi durante un conferencia di prensa. Lopez mientrastanto a yega Spaña y ta den compania di su famia. 

KICO A SOSODE

Tabata siman pasa cu e noticia a plama cu Lopez a huy di Venezuela y tabata na caminda pa Spaña, via Colombia y despues Aruba. El a sali di e embahada Spaño unda cu e tabata huesped pa algo mas cu un aña, despues di tabata encarcela den prison y despues na su cas riba ‘huisarrest’ y a ‘huy’ pa Colombia y sigui pa Aruba, prome cu e biaha pa Spaña. E periodista conoci Venezolano Nelson Bocaranda a raporta riba su cuenta di twitter cu Lopez tabata ‘na caminda pa Aruba awe mes y despues lo sigui pa Spaña awe mes’. Mesora rumornan a cuminsa core di e tema aki. Como 5 medio internacional a raporta e huida y dos di nan a haci mencion di Aruba como un posibel ‘pais’ trampolin pa su huida pa Spaña. Lopez ta un di e adversarionan mas fuerte contra e regimen Chavista.