Tin control extra pa regla di COVID19 durante weekend di Halloween na Aruba

ORANJESTAD – “E reglanan lo no wordo suaviza pa e fin di siman aki” prome minister Evelyn Wever Croes a bisa dialuna anochi durante e briefing di COVID19. E ta referi na reglanan di COVID19, cu tin vigente aworaki. E fin di siman aki ta e fin di siman di e celebracion Mericano Halloween, unda cu establecimentonan nocturno normalmente tin celebracion grandi pa e tema. Pero mirando cu tin COVID19 y reglanan estricto, esaki lo por tin su consecuencianan.

PROPAGANDA

A compronde cu algun establecimento ta haciendo basta promocion pa e evento aki, y sigur un of dos bar en particular. Basa riba esaki a puntra e mandatario con lo atende cu e situacion aki y kico e situacion lo ta. “E reglanan ta keda na vigor” Wever a sigura. “Es mas, nos lo tin mas control cu nos ta bay introduci den e fin di siman aki” e mandatario a sigui bisa, indicando cu no mester kere cu pasobra ta Halloween, lo por surgi un ‘free for all’ cu e fiestanan aki. E mandatario no a bisa si, si ta permiti e fiestanan di Halloween aki. “Ta importante pa tur hende atene nan mes na e reglanan. No tin aglomeracion. Corda e horario nan unda bo por ta ariba caminda publico” Wever a sigui bisa, recordando riba e prohibicion di beachnan, parkinglot etc. entre mei anochi y 5or di marduga. E mas cerca di bisa cu lo no tin celebracion di Halloween manera nos conoce, tabata cu ‘no por tin tipo di fiestanan manera cu nos tabata custumbra den pasado’. E hecho cu no tin toque de queda mas, no kier men cu hendenan no mester tene nan mes mas na regla. A subraya varios biaha cu lo tin control hopi mas estricto e fin di siman aki.