ORANJESTAD – Durante un conferencia di prensa di Gobierno, Minister di Finanza y Economia Xiomara Maduro a presenta e Pakete di Alivio Fiscal 2 cu incentivonan fiscal pa activa nos economia cu lo drenta na vigor entrante 1 di November 2020. Na momento cu e crisis di pandemia Covid-19 a presenta na luna di maart ultimo, Gobierno di Aruba a brinda un Alivio Fiscal cu tabata vigente pa lunanan di April, mei y juni 2020. Alaves Gobierno di Aruba a brinda ayudo financiero na e sector di comercio den forma di Subsidio di Salario y tambe e sosten financiero di 4.000 florin pa kwartaal na negoshinan chikito y mediano pa asina yuda e sector di comercio pa nos economia por a sigui lora. Awor ta sigui cu Alivio Fiscal 2 pa por activa economia di Pais Aruba.
PAKETE DI ALIVIO FISCAL 2
E pakete di Alivio Fiscal 2 ta consisti di 11 punto pa e sector di comercio y e particulier y ta contene algun incentivo cu ta conta pa maximalmente tres aña. E incentivonan tin nan reglanan cu ta riba www.impuesto.aw
1. Comerciante chikito cu un benta te cu 84 mil florin pa aña lo ta liber di e impuestonan di BBO, BAZV y BAVP desde aña 2021
Na aña 2018 Gobierno di Aruba a introduci e ‘Kleine Ondernemings Regeling’ (KOR) cu tabata encera cu bentanan te un maximo di 12.000 florin pa aña ta keda exonera di BBO, BAZV y BAVP y montante a keda hisa awor pa un montante di maximal 84.000 florin pa aña. E incentiva aki ta conta pa companianan chikito manera snacktruck, taxi, bus, artesano, musico, pelukeria etc. y tambe e companianan chikito cu ta start awor.
2. Companianan den e Sector Prometedor di Turismo, Economia di Conocemento, Logistica, Agricultura, Economia Circular y Industria Creativo por deduci 50% di nan prestamo te un maximal di 30.000 florin for di nan inkomsten y winstbelasting pa aña 2020, 2021 y 2022.
Esaki ta nifica si un compania den e sector prometedor haci un prestamo di 50.000 florin, e compania por deduci 25.000 florin. Pa un prestamo di 100.000 florin, e compania por deduci un maximo di 30.000 florin for di su Inkomsten- y winstbelasting.
3. Deduccion di 300% di gasto di formacion profesional pa aña 2020, 2021 y 2022.
Actualmente ya caba por deduci gastonan di formacion profesional, pero awor por bay deduci 3x e montante di e gasto di e curso. Esaki ta un iniciativa importante paso den e normal nobo hopi cos lo bay cambia y esaki lo exihi entre otro cu lo mester di otro abilidadnan. Esaki ta conta tambe pa un persona cu a perde trabou y den e trabou nobo mester di un formacion profesional pa haya e conocemento necesario.
4. Deduccion di 200% di gasto di promocion y mercadeo te cu un maximo di 30.000 florin pa aña 2020, 2021 y 2022
Door di e pandemia COVID-19 companianan a haya nan ta haci gasto extra di promocion y mercadeo, manera gasto di traha un website, gasto di traha diseño di propaganda y gasto di presencia riba medianan social. Tur e gastonan aki e compania chikito awor tin oportunidad di kita for di nan inkomstenbelasting como gasto di negoshi.
5. Compensacion di perdida fiscal di aña 2020, 2021 y 2022 te cu 7 aña.
Actualmente e companianan tin un periodo te cu 5 aña pa por compensa nan perdida. E crisis di pandemia ta trece cune cu companianan lo sufri perdida fiscal posiblemente pa añanan 2020, 2021 y 2022. Actualmente e companianan aki tin un periodo di maximal di 7 aña pa por compensa nan perdida.
6. Maneho suavisa di tarifa di 10% di dividendo pa accionista biba na Aruba.
Aña pasa Gobierno di Aruba a baha e tarifa di dividendo di 25% pa 10% y awor ta suavisa esaki atrobe. E tarifa di 10% ta bay conta tambe pa e compania estableci den exterior na momento cu e paga dividendo na un accionista biba na Pais Aruba. Antes e tarifa di 10% tabata aplicabel solamente pa companianan estableci localmente cu ta paga dividendo na accionistanan local.
7. Maneho mas amplio di e regulacion di fondo di ‘spaar-en voorzieningfonds’ pa aña 2020 y 2021.
Hopi compania tin un fondo di spaar pa su trahadonan y esakinan tin cu warda 4 aña pa por haya e placa di spaar. Cu e maneho nobo aki por lanta e placa sin paga impuesto. Esaki ta conta pa situacionnan manera entre otro entiero, compra di cas, estudio di yiu y otro casonan di emergencia.
8. ‘Investeringsaftrek’ ta wordo subi pa 10% y ta conta tambe pa producto di inversion cumpra den exterior. Cu e incentiva aki companianan cu cumpra ‘bedrijfsmiddellen’ cu ta destina pa inversion, cumpra local of den exterior por wordo deduci cu e tarifa di 10%.
9. Anulacion di impuesto di auto y motorcycle di huur entrante e di cuater cuartal di aña 2020.
Actualmente e companianan di huur auto y motorcycle tin cu paga un ‘environmental tax’ (Bijzonder belasting op verhuurauto’s en verhuurmotorfietsen - BBVAM) di 96 florin riba cada auto y motorcycle sea cu e wordo gehuur of no. Cu e incentivo aki ta anula e ‘environmental tax’ y lo incorpora esaki den e vergunning. Pero ta necesario si pa e companianan di huur auto y motorcycle yena nan aangifte nihil (zero) pa e periodo di October te cu December 2020.
10. Areglo di pago flexible pa empresa, particulier y pensionado 60+.
Pa haci e debe pagable teniendo na cuenta e situacion cu nos Pais ta aden, Gobierno di Aruba a bin cu e siguiente areglo di pago:
pa empresanan: un areglo di pago di 3, 6 y 12 luna cu un minimo di 500 florin
pa particulier: un areglo di pago di 6, 12 y 18 luna cu un minimo di 100 florin
pa pensionado un areglo di pago di 12, 18 y 24 luna cu un minimo di pago di 75 florin pa luna.
11. Por sanea debe di impuesto den un solo pago cu un descuento di 30% te cu dia 30 di juni 2021.
Tur persona cu tin debe bieu di impuesto tin oportunidad di paga esaki den un solo biaha y lo ricibi un descuento di 30% te cu dia 30 di juni 2021.
INCENTIVONAN PENDIENTE
E mandatario a sigui informa cu Gobierno di Aruba ta trahando tambe riba reduccion di inkomensten y loonbelasting. Na comienzo di aña pasa ya caba den Reforma Fiscal a baha e impuestonan aki y actualmente expertonan di impuesto ta haciendo e calculacionnan necesario pa conseha Gobierno di Aruba cuanto mas e impuestonan aki lo por baha. Tambe ta pendiente reduccion di tarifa di ‘invoerrechten’ di material di construccion, ya cu internacionalmente ta papia cu e prijs di e materialnan lo bay subi. Pa e motibo aki Gobierno di Aruba ta contempla pa wak con por reduci e impuesto riba e materialnan aki.
EMPUHE NA NOS ECONOMIA
Minister Xiomara Maduro ta enfatisa cu Gobierno di Aruba a bin cu e incentivonan fiscal aki pa asina por duna un empuhe na nos economia. Gobierno di Aruba a inclui mas tanto posibel e peticionnan di e gremio comercial pa nos economia por keda draai. Minister Maduro ta gradici tur e expertonan cu a traha riba e Pakete di Alivio Fiscal y ta spera cu comercio lo sa di haci bon uso di e alivio brinda.
ORANJESTAD – Siguiendo cu e trayecto di digitalisacion pa procesa declaracionnan y cobransanan di impuesto mas eficientemente, Departamento di Impuesto ta sumamento satisfecho di por anuncia cu e formulario di declaracion di winstbelasting awor ta wordo otorga den forma digital. Pues, entregamento di e declaracion ta sosode electronicamente. Esaki ta valido pa e declaracionnan desde aña fiscal 2023.
ORANJESTAD - Minister di Asuntonan Economico, Comunicacion y Desaroyo Sostenibel ta anuncia e prijsnan nobo di benta di combustibel entrante 8 mei 2024:
ORANJESTAD - A.T.A. ta sigui promove un turismo di mas balor pero cu menos impacto. Asina CEO di ATA, Ronella Croes a bisa durante e conferencia di prensa dialuna riba e cifranan annual 2023. Segun Croes,
ORANJESTAD - Merca ta sigui domina pero turismo di Latino America a crece mas aña pasa. Asina CEO di ATA Ronella Croes a bisa dialuna durante un conferencia di prensa riba cifranan di 2023. Segun Croes, Aruba a atrae un total de 1.243.554 bishitante na aña 2023, locual ta traduci den un recuperacion di 111% ora compar’e cu aña 2019. Aña pasa e mercado di Merca y Latino America crece mas. Merca por ehempel a crece cu 13% den cantidad di bishitante, mientras cu Latino America a subi cu 22%, den comparacion cu aña 2019. Europa, di otro banda, no a logra alcansa un crecemento, sino ainda ta den recuperacion. Compara cu aña 2019, a recupera cu 77%. Ta observa e mesun tendencia aki den otro islanan di Caribe tambe.
ORANJESTAD - Consumidornan tabata menos pesimista den e di segundo mita di 2023, mirando cu e indice di confiansa di consumidor a subi cu 1,5 punto di indice te na 94,1 den e di tercer trimester y cu 0,9 punto di indice te na 95,0 den e di cuater trimester di 2023 (Grafiek 1) .