Reunion di ministernan di husticia di Reino ta cuminsa mayan

DEN HAAG – Diahuebs ta cuminsa e reunion entre ministernan di husticia di Reino, conoci como e JVO, (Justicieel vier partijen overleg). Dos biaha pa aña e cuater Ministernan di Husticia di Reino Hulandes ta reuni na un di e paisnan pa combersa encuanto temanan comun pa cual mester discuti colaboracion y tuma decisionnan importante cu ta contribui na e siguridad di e diferente paisnan. E reunion e biaha aki ta tuma luga na Hulanda. Minister di Husticia Arthur Dowers a splica cu e biaha aki ta trata e presupuesto di Corte Comun y si no tin problema esaki lo wordo aproba, lo papia tambe tocante Recherchesamenwerkingsteam (RST), Kustwacht y otro temanan cu ta regarda siguridad na Aruba, Corsou, Sint Maarten, y Hulanda y BES.

Dowers a remarca cu Husticia no ta un asunto di Reino, pero e echo cu e partnernan den Reino tur tin un relacion asina estrecho, nan ta depende di otro pa garantisa e siguridad di e diferente paisnan, cual ta haci e reunionnan aki necesario.

Un tema cu ta bin dilanti na cada reunion ta e “gemeenschappelijke voorziening rechtshandhaving y polis. E tema aki no ta concerni Aruba, pero representantenan di Aruba ta atende e reunion y tin biaha ta wordo puntra pa nan opinion, Minister Dowers a bisa. E tema aki y topiconan relaciona na dje ta concerni Hulanda y islanan BES.

Prome cu su biahe, Minister Dowers den un entrevista a splica cu e biaha aki lo tin un tema nobo, cual a wordo propone pa Hulanda den un “discussienota”, unda e minister di Hulanda ta boga pa un “masterplan pa veiligheid” pa e diferente islanan. E mandatario a bisa cu Aruba ta dispuesto pa coopera den esaki pasobra siguridad ta depende un parti grandi riba otro. Ta comun cu e islanan ta traha hunto y hunto cu Hulanda na momento di cierto investigacionnan. Tin casonan unda cu e diferente cuerponan policial, por ehempel entre Aruba y Corsou, ta apela riba colaboracion pa cu personal di arestatie team of asistencia pa loke ta experticio den caso di cierto investigacionnan.

Loke Hulanda kier ta refuerso pa e islanan BES y kier hiba esaki un paso mas leu. Minister Dowers a bisa cu loke Aruba kier ta yega na un forma di cooperacion unda ta pone cierto expertonan disponibel pa investigacionnan. Esaki lo tin como resultado cu e paisnan tur lo tin expertonan super specialisa disponibel pero no mester tin nan continuamente den servicio, locual lo costa masha hopi placa. E intencion no ta, segun Dowers pa RST bira un organisacion federal cu ta traha na bienestar di nan pais so, pero ta sigui – manera e ta awendia - un team policial cu ta traha pa tur isla.

Finalisando, Minister Arthur Dowers a bisa cu e discussienota manera el a wordo presenta ta un documento cu Aruba por traha cune y ta wak e como algo positivo unda tur partner ta duna contribucion na aumenta siguridad na e diferente paisnan. Loke ta un condicion hopi importante pa esaki funciona bon ta cu e mester wordo desaroya y efectua na un forma mas habri y transparente posibel cu ta cla pa tur hende kico e plan ta y con lo ehecut’e pa asina haya e sosten tambe pa esaki.