Conoci personalidad Glenda Arends a biaha cu urgencia pa Hulanda pa salud

ORANJESTAD – Conocido personalidad na Aruba Glenda Arends, mester a biaha urgentemente pa Hulanda diadomingo pa su salud. Debi na multiples peticion, famia a dicidi di haci un publicacion pa asina por complace e cantidad grandi di peticion pa cu su situacion. 

KICO A PASA

Despues cu Glenda Arends a atende cu entiero di su mama Elsa Geerman diaranzon ultimo, el a cuminsa sinti malo y a wordo interna cu urgencia diahuebs anochi mes na Dr. Horacio Oduber Hospital. Mirando cu su situacion ta delicado, a opta pa transporte awe (diadomingo) atardi cu urgencia pa Hulanda unda cu e lo wordo interna pa tratamento. Glenda Arends no ta un desconoci aki na Aruba. Manera informa, e ta un personalidad conoci na Aruba unda cu e tabata e.o. e cara di Telearuba pa hopi aña presentando entre otro Telenoticia, Papia Cla y su propio programa Ban Cushina. Noticiacla kier a desea Glenda tur clase di exito cu su tratamento y cu pronto Dios mediante e ta bek na Aruba cerca su estimado familia y amistades.