Lopez: Tin mucho mas tras di esaki, cu djis un simple retiro

ORANJESTAD – “Tin mucho mas tras di esaki, cu djis un simple retiro” ex minister Marisol Lopez Tromp a bisa durante su prome reaccion diasabra atardi den un conferencia di prensa na e ‘Rancho di Nel’ na Barcadera. E ex mandatario a repasa tur loke a sosode rond di su retiro, y tambe su interpretacion nificacion. A tilda e.o. e ex mandatario Otmar Oduber (no na nomber sino referencia na ‘e ex gobernante cu mi a reemplaza’) di ta e ‘forza ajeno cu tabata purba duna instruccion na e partido y gobierno. Y finalmente no ta conoci ainda kico su futuro ta pa cu politica. Loke no a tende, ta e nomber di esnan cu lo ta envolvi den iregularidad nan pa cual a entrega retiro. 

MOTIBO REAL PAKICO DI E RETIRO

Lopez Tromp un biaha mas a mustra cu e retiro no tin nada di haber cu su prestacion como minister of cu si e la causa un ‘onwerkbare situatie’, esta un situacion unda cu no por a traha mas cu ne, sino mas bien pasobra e la cuminsa combati casonan di iregularidad, corupcion y susesonan den departamento di gobierno cu no ta corecto y cu a wordo permiti den pasado. Mientras cu e no sa e motibo, e hecho ta cu a haci tur posibel pa por a retira su persona, unda cu ora cu a mira cu no por a retira Lopez via un forma, a dicidi di hacie via un otro forma, contal cu e awor ex minister, haya su retiro. 

NO WORRY CU LEGALIDAD

E ex mandatario a para keto tambe riba e hecho cu segun su persona, premier Wever Croes tabata hala e ‘legalidad’ di e mocion di desconfianza un banda, mandando un mensahe robez pa comunidad, cu lo ta permiti proceduranan ilegal di tuma lugar, manera e mocion di desconfianza cu no tabatin e cantidad rekeri segun ley, pa keda aproba.

CARTERA PA MEP

Un punto ‘nobo’ cu tambe Lopez a trece dilanti, tabata e parti unda cu gabinete Wever Croes a opta pa envez di duna e carteranan di e awor ex mandatario Lopez Tromp, na un otro persona di partido POR, a dicidi di duna e cartera na partido MEP. Insolito, ta loke cu Lopez a considera e paso aki y cu hopi hende lo no a cay ariba. Algo cu segun Lopez, no a yega di sosode den pasado tampoco. E hecho cu tin un partido cu tin dos parlamentario, pues dos asiento, cu derecho pa dos minister, awor tin solamente un minister, y cu e lider di e partido en cuestion (Andin Bikker: red) no a duna un comentario of reaccion ariba.