Cu buelo inaugural pa Manaus, Insel Air ta duna oido na peticion di gobierno

ORANJESTAD – Insel Air Aruba ta creciendo na un forma hopi rapido, y e buelo inaugural pa Manaus (Brazil) , ta un muestra di esaki. Minister di Turismo Otmar Oduber a mustra cu e ta agradecido cu e compania a duna oido na e peticion di gobierno, pa inclui Brazil riba e itinerario di e aerolinea local. E cantidad di avion y e tiponan cu e aerolinea ta usando ta un indicacion di e confiansa cu e compania tin den e mercado. “Awe cu hopi satisfaccion mi kier desea boso hopi exito cu e buelo inaugural pa Manaus” Oduber a bisa. E ta spera cu e buelo aki bira uno ‘permanente’ y cu e ta e prome di hopi destinacion pa Brazil.

ATA

Di parti di Aruba Tourism Authority, CEO Ronella Tjin-A-Sjoe ta considera e buelo inaugural como un ‘logro grandi’. E la priminti cu ATA lo traha duro riba coneccionnan nonstop for di Brazil. E ta mustra cu Brazil ta un mercado cu ta creciendo na un manera hopi positivo pa Aruba. “E ta un mercado cu potencial pa redobla den cantidad di pasahero pa e proximo añanan”. Pero pa logra esaki, mester tin coneccionnan nonstop. Tin esaki caba hopi bon, y tambe partnershipsnan. Den esaki Insel Air ta hunga un rol hopi importante y cu e buelo aki, e ta un muestra cu nan ta ‘scucha’ loke ta importante pa Aruba y pa e maneho di turismo. “Esey ta haci cu awe nos por ta celebrando inauguracion di un buelo nonstop for di Brazil”. E ta hopi importante y un paso cu lo sigui cu mas paso cu ta cuadra perfectamente cu e strategia di ATA y Aruba. Segun e CEO, a haci varios actividad caba na december di aña pasa, cu miras pa e introduccion di e buelo aki. Y aworaki e ekipo di ATA na Brazil ta wardando ansiosamente riba e llegada di e buelo y por traha hunto.

INSEL AIR

E CEO di e aerolinea mes, Frederick Nuboer a mustra cu tres aña pasa a cuminsa cu e proyecto di Insel Air Aruba. E tempo ey , segun Nuboer, minister actual di turismo a haci’e ‘duidelijk na Insel Air cu un di su deseonan ta pa bula pa Brazil. “Den e caso aki nos a cuminsa cu Manaus, pero mi sa cu e deseo ta pa bula un tiki mas leuw cu esey” Nuboer a bisa. E intencion di e prome buelo di diaranson tabata pa hiba algun invitado, partnernan strategico pa Aruba pa ‘proof’ un tiki kico Manaus tin di ofrece Aruba. E buelo mes a tuma lugar den e avion nobo Fokker 70.