Wever-Croes: Situacion di tankero Nabarima ta bou di control

ORANJESTAD – E situacion di e tankero Nabarima ta bou di control. Asina prome minister Evelyn Wever-Croes den conferencia di prensa di Gobierno di Aruba diabierna mainta a bisa riba e problema cu tin na e momento aki cu e tankero Nabarima. E tankero aki cu tin un total di 1.3 miyon bari di crudo a accidenta dilanti costa di Venezuela. 

Aruba, prome cu e accidente aki ya tabata den un estado di alerta, ya cu e tankero aki tabata indica di ta bay sink, cual pa nos costa lo bira un situacion devastador. Rampen Bureau di inmediato a activa su estado di alerta y ta monitor e situacion.

Prome Minister a pidi Rampen Bureau pa busca un ekipo di “response” cual nan a haci pa en caso tal crudo cuminsa move den nos direccion, evitando asina pa e no afecta nos beachnan. WEB tambe mesora a institui un ekipo pa vigila y pa tuma tur paso necesario pa evita cu un derame por afecta e calidad di awa cu WEB ta produci.

PDVSA cu no kier a perde e crudo, a manda un tankero AFRAMAX ICARO pa traspasa e crudo di NABARIMA pa ICARO y te cu diahuebs a logra di traspasa mitar di e crudo. 

Cu e traspaso aki e nivel di riesgo pa Aruba ta baha mirando cu esaki ta yuda pa e tankero aki tin menos chens pa kentel. 

Prome Minister a indica cu e situacion na e momentonan aki ta bou control. Aruba ta keda si den estado di alerta pa mira con e desaroyo di traspaso di crudo ta sigui.