Cu aceptacion di 3 punto, Aruba lo firma e pakete di Hulanda

ORANJESTAD – Cu aceptacion di tres punto di parti di Hulanda, Aruba por acepta e pakete cu ta wordo negosha aworaki. Asina premier Evelyn Wever Croes a bisa diabierna mainta durante un conferencia di prensa. Specificamente riba pregunta di noticiacla, sra Wever a sigura cu enberdad si Hulanda aproba e tres puntonan aki, Aruba lo firma e pakete porfin. 

TRES CAMBIO

Sra Wever-Croes durante  conferencia di prensa a informa tambe cu e negociacion cu Hulanda ta andando cu menos intensidad y ta ‘bayendo den bon direccion’. Prome Minister a indica cu tin 3 cambio cu pa Gobierno ta hopi importante pa por yega na acepta e pakete. 

PROME CAMBIO

E prome cambio, Gobierno no ta papia mas di fianza pa 3de of 4de tranche sino di loke Aruba mester te cu December 2020. Esaki ta pa evita discusionnan manera cu tabata tin na September. E suma aki ta 3de y 4de tranche combina, kitando e suma cu Aruba a haya riba mercado local. 

DI DOS CAMBIO

E di dos cambio ta cu ta bay bin un lid nobo den articulo 4-2 di e Rijkswet di entidad caminda ta para explicitamente cu e entidad lo no por haya autoridadnan di Gobierno ni di Parlamento.  Cu esaki e autonomia di nos pais, Gobierno y Parlamento ta garantiza.    

DI TRES CAMBIO

E di tres cambio ta cu despues di 3 aña ta bay bin un “evaluatie bepaling” y a base di e evaluacion por bin posibel cambio pa e siguiente tres añanan. 

KITA PREOCUPACION

“E cambionan aki ta kita sigur hopi preocupacion di gobierno. Na e momento aki Gobierno ta sperando e texto final pa por mira e dos cambionan aki den e ley. Tambe Gobierno ta en espera di un ‘advies’ di CAFT pa cu e suma necesario te cu December. Mi lo tene comunidad altanto unabes cu tin mas informacion. Gobierno ta trahando diligente mente pa keda cla mas lihe posibel. Gobierno tin fondo financiero disponibel te cu mitar di November y pa e motibo aki ta trahando pa caba prome cu e periodo aki, Prome Minister Evelyn Wever-Croes a duna di conoce.