Warda Costa buscando dos piscado di Aruba cu ta perdi

ORANJESTAD - E Centro di Rescate y Coordinacion di Wardacosta a haya un yamada diahuebs anochi di famia di dos piscado cu ta perdi riba laman. E dos piscadornan a sali cas diahuebs mainta cu nan boto Rubia, pa regresa cas bek diahuebs atardi pa 4:30pm. E famia di e piscadornan a tuma contacto cu Wardacosta pa hasi un yamada pa un buskeda y rescate di nan famia riba laman. Wardacosta a dirigi e avion Dash y un Metal Shark mesora direccion di e supuesto localidat di e boto Rubia, pero lamentablemente ningun di e unidatnan no a encontra e boto. Awe mainta y awe merdia e avion Dash a bolbe hasi un vuelo di buskeda riba laman pa encontra e dos piscadornan perdi. Den e buskeda Wardacosta ta haya colaboracion di Search and Rescue Foundation Aruba cu ta bai yuda cu un avion civil.

Locual ta hasi e buskeda un reto ta e hecho cu e condicion di laman ta basta malo. E laman ta bruto cu hopi biento y olanan halto. E Centro di Rescate y Coordinacion di Wardacosta a saca un notificacion pa barconan riba laman tambe tin un ‘sharp lookout’ pa e boto perdi. Wardacosta y e partnernan cu ta colabora ta hasi tur posibel pa logra localisa e piscadornan perdi riba laman.