- Gotopo: Prolongacion di cierre frontera cu Venezuela ta un medida absurdo
- Ultimatum pa dicidi riba suma cu radionan mester paga DUCAPRO tur luna, a vence sin resultado
- Inflacion ta mas abou na Boneiru, mas halto na Sint Eustatius y Saba
- Gobierno Hulandes ta evaluando pa stop su paginanan riba Facebook
- Travel& Leisure: Aruba ta top lista di 10 resortnan all-inclusive den Caribe
Jordan Ling Foundation/Respaldo: Con pa inverti den bo propio Salud mental
ORANJESTAD - Como parti di e luna di concientizacion di Salud Mental, Fundacion Respaldo y Jordan Ling Foundation ta sigui cu e serie di programanan informativo. Na e radio emisora Hits100 FM, durante e Entrevista di Dia, Giullita Anthony, Gezondheids Zorg Psycholoog a amplia riba e tematica di salud mental.
Giullita a studia e profesion di Psicologo na Hulanda y despues el a specializa pa por trata varios trastorno cu ta relata na salud mental.
Pa loke ta e tema 'Inverti den Salud Mental', cual ta e enfoke di e luna di concientizacion di e aña aki, e psicologo a splica cu locual un persona por haci pa inverti den salud mental ta purba preveni y hasta busca ayudo ora cu tin problema.
Esey ta algo cu tur hende ta lubida, pero den e sociedad di awendia ta hopi importante pa haci 'self-care', tuma tempo pa por recarga y sigui biba.
Giullita Anthony a añadi cu si un persona ta ripara cu algo no ta bon cu ne ta importante pa bay bo docter di cas y puntra pa ayudo.
Un persona por haya sa cu su salud mental no ta bon door di ripara cu su bida no ta bay manera e ta spera.
Un di e trastornonan cu na Respaldo ta mira hopi ta depresion y esaki ta manifesta cu entre otro sinti 'down', no ta sinti contento, y te hasta cu pensamentonan di no kier biba mas. Ora cu ta cuminsa ripara situacionnan asina ta momento pa bay papia cu bo docter di cas, asina Psicologo Anthony a remarca.
Sr, Croes a puntra pa algun tips cu e Psicologo Anthony por recomenda. “Si y un di e tipsnan ta; wak bo mesun energia y compara bo energia cu esun di bo telefon celular. Hopi biaha nos ta wak cuanto porciento di bateria nos telefoon tin pero nos ta lubida di observa e energia di nos propio curpa.
Tambe mester wak si ta durmiendo suficiente, si a come bon, si bo a cuida bo mes. Practica un actividad tambe ta masha recomenda manera cana, landa, haci algo cu bo ta disfruta. Keda activo fisicamente. Lesa buki, practica un arte.
Locual na Respaldo nos a ripara durante e pandemia ta cu e mesun hendenan cu tabata wordo atendi caba ta bin bek, como tambe hendenan cu ta biba nan bida normal, pero cu por tabata tin un vulnerabilidad pa haya un trastorno.
Durante e pandemia tambe ta constata e vulnerabilidad pa haya un depresion. E actividadnan di custumber no tey mas y esey ta causa stress y e persona ta cay den un depresion. E hendenan cu tabata tin problemanan caba of cu tabata tin vulnerabilidad caba pa haya problema ta nan ta acerca Respaldo aworaki, asina Anthony a señala.
Ta trata di personanan den un rango di edad entre 18 y 75 aña. Cada persona y nan transtorno ta wordo trata diferente. Tin personanan cu ademas di un depresion tambe tin problemanan social, laboral, financiero, familiar, a splica.
Locual nos ta lubida hopi biaha ta cu nos ta na bida. Nos haci nos mes hopi ocupa cu trabao, yiunan, pareha y tur otro cos y ta lubida nos mes", Giullita Anthony a expresa.
"Si bo no yuda bo mes, bo no por tey pa otro hende, bo no por tey pa bo trabao y bo no por haci tur e otro cosnan", el a agrega.
Ta bon pa señala cu Respaldo ta conta tambe cu un departamento special pa atende cu hobennan. Si abo como mayor ta pensa cu bo yiu mester ayudo, bay docter di cas y puntra pa ayudo.
Awendia tin hopi influencia di social media y tin hopi bullying como tambe acoso online ta sosode. E profesionalnan di Respaldo lo por yuda e hobennan con pa anda cu e situacionnan aki cu no solamente ta presenta den bida real pero tambe online. A constata cu na Aruba no ta gusta papia di salud mental pesey ta necesario pa percura pa abo cuida pa bo mes y si bo por hacie prome cu bo tin un problema cu salud mental, haci’e", Giullita Anthony a declara durante e entrevista interesante aki riba e tema di salud mental.
Keda pendiente pa mas temanan relevante durante e luna di conscientisacion di salud mental.
HOH: Ocupacion di cama poco poco ta bek na normalidad na hospital
ORANJESTAD - Horacio Oduber Hospital ta comparti cu comunidad di Aruba e cifranan pa loke ta luna di maart 2024. E cifranan aki banda di brinda transparencia y informacion ta duna comunidad di Aruba un indicacion di cuanto pashent Hospital ta atende mensualmente, cuanto operacion ta tuma luga, pero tambe cuanto donacion di sanger a tuma luga na Bloedbank y mas.
Stampiaaruba cu exposion di stampia na Aruba pa celebra 17 aniversario
Oficina principal di DIMP ta cera awe diaranson pa mantencion
ORANJESTAD – Departamento di Impuesto ta su oficina principal na Camacuri lo ta cera pa publico diaranson, dia 24 di april 2024. Esaki ta debi na trabounan di mantencion necesario na e edifico. Mientrastanto Departamento di Impuesto kier sigura cu ta sigui brinda servicio na publico sin interupcion. Siguientemente ta sigui un skema di e servicionan.
Den cuadro di reposicionamento, FPNA ta cambia su nomber pa Aruba Conservation Foundation
ORANJESTAD – E organisacion independiente di conservacion di naturalesa conoci como Fundacion Parke Nacional Aruba (FPNA) ta usa e ocacion mundial di Dia di Mama Tera pa revela su transformacion pa Aruba Conservation Foundation (ACF). E transformacion akinan ta encera un nomber nobo, un logo, y identidad visual nobo cu ta alinea na e direccion strategico di e organisacion como un organisacion moderno di maneho di conservacion y alavez ta alinea na e necesidad actual pa conserva naturalesa di Aruba. Asina, e organisacion ta despedi di ta un organisacion tradicional di maneho di parke cu hopi a bin ta conoce pa mas cu 20 aña.
Parlamentario Ryçond Santos Do Nascimento ta invitado den Noticiacla LIVE awe nochi
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
AZV: Contracto cu dentista Mayra Rosales ta termina
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.
Follow NoticiaCla
