Den Comision Central, mayoria di coalicion a bay di acuerdo pa retira Minister Marisol Lopez Tromp

ORANJESTAD – Den un reunion di Comision Central diahuebs atardi, fraccionnan di coalicion (11 miembro) a duna nan ‘aprobacion’ pa retiro di minister Marisol Lopez Tromp, cumpliendo asina cu peticion di Gobernador Alfonso Boekhoudt, cu a pidi pa midi e ‘sentimentonan’ riba e tema aki. Cu e decision aki, no tin ningun barera mas pa Gobernador firma retiro di minister Marisol Lopez Tromp, y pasa e carteranan respectivo pa minister presidente Evelyn Wever Croes. 

E CARTA

Mas prome, manera cu e portal aki a raporta, Gobernador despues di a ricibi un carta di gabinete Wever Croes riba e re tiro di e colega minister, a manda un carta pa presidente di Parlamento pa pidi e ‘gevoelens’ di Parlamento riba e retiro. No ta conoci ‘oficialmente’ si esaki kier men cu Gobernador no ta acepta e mocion cu basicamente a duna ‘ok’ caba di parti di e mayoria di e reunion ey (aunke ta 10-0), y cu ta pesey a pidi e ‘sentimento’ di Parlamento ‘un biaha mas’.