Gobernador a pidi huicio di Parlamento tocante intencion pa retira minister Lopez Tromp

ORANJESTAD - Gobernador di Aruba awe mainta a ricibi un concepto di un decreto nacional pa aprobacion di minister president Wever-Croes. E concepto di e decreto ta trata retiro di minister di Desaroyo Teritorial, Infrastructura y Medio Ambiente, señora Lopez-Tromp. Conseho di minister a aproba e retiro dia 21 di October 2020.

Gobernador di Aruba a dirigi un carta awe merdia na Presidente di Parlamento den cua ta pidi pa e huicio di Parlamento tocante e intencion pa retira e minister. Ta pidi e huicio aki a base di articulo II.2, prome paragraf, di Constitucion di Aruba.

Den e carta Gobernador ta señala cu funcionamento di gobierno ta na peliger si no por garantiza unidad di e politica gubernamental. Tanto pa e ministernan conhunto como pa cada minister individual ta di importancia pa, en cuanto e politica, nan ta riba e mes un liña y cu nan ta propaga of por propaga e liña ey.