Docentenan di Colegio San Nicolas cu deadline pa minister Lampe

ORANJESTAD – Docentenan di Colegio San Nicolas (CSN) pa medio di nan sindicato SIMAR a duna minister di enseñansa Rudy Lampe te diabierna 4’or di atardi, pa informa ki dia nan ta ricibi nan pago di overtime manera concorda. Asina presidente di e sindicato Josephine Albertus a bisa diahuebs merdia durante un conferencia di prensa. E docentenan en cuestion a bin haya sa riba dia cu e pago di salario a tuma lugar, cu nan no ta wordo paga e overtime en cuestion. Y e biaha aki, e docentenan a dicidi di no acepta y a bay den un accion via un reunion na SIMAR diahuebs mainta. 

KICO A SOSODE 

Ta awe mainta ora cu dado momento mayornan a hiba nan yiunan CSN, a bin ripara cu no tin les. Y aki yamadanan a cuminsa ya cu ta net durante siman di SO cu ta un siman importante. Ayera e docentenan a acerca SIMAR indicando cu nan a haya nan payslip y cu algo no tabata cuadra. Segun Albertus, 16 di September 2020 a bin un carta unda cu ta wordo bisa cu e overtime cu a wordo acorda pendiente, prome cu aña escolar nobo (durante COVID19), lo wordo paga e luna aki. Pero dia 16 di October 2020 a bin un otro carta di Dienst Publieke Scholen (DPS) cu ta bisa cu nan no lo por cumpli cu e carta di 16 di September 2020 mirando e situacion di COVID19, y ta puntra pa e management team informa e docentenan riba esaki. Pero nunca, segun Albertus, e docentenan no a wordo informa. Ta door cu nan a ricibi nan pay slip, a ripara cu e oranan no ta poni den e pay slip. Aki ta unda cu nan a pone pia abou. 

CLARIDAD

Esey a nifica cu durante un reunion awe mainta entre 8-10 am, e docentenan a reuni (tabatin 23 docente di e team) riba e asunto. A bin resulta cu aña pasa September tabatin e mesun problema, unda cu tambe docentenan no a wordo paga. Aki e docentenan a sali pero un grupo chikito so a haci esaki. E grupo di awe, tabata uno mas grandi, cu ta fada di e situacion. A bisa cu e biaha aki no ta bay tene cuenta cu e situacion y ken ta perhudica, pues a dicidi di bay sali pa nan derecho. Asina mes a sigura cu e alumnonan cu a perde nan les, a garantiza cu nan lo haya esaki regla pa nan no perde esaki.