AZV a termina relacion di trabou cu su director Ruben Goedhoop definitivamente

ORANJESTAD – AZV a termina e relacion di trabou cu e awor ex director Ruben Goedhoop entrante awe diahuebs mainta. Asina AZV ta informa pa medio di un comunicado. Esaki ta conclui e episodio cu a inicia for di diabierna siman pasa ora cu a suspende Goedhoop pendiente un investigacion. Diasabra e portal aki a raporta riba e suceso aki. 

CLARIFICA

Mientrastanto AZV a clarifica diahuebs cu ora cu usa e termino ‘investigacion’, esaki ta inclui tambe discusionnan cu lo tuma lugar den e dianan nos dilanti y tambe otro exploracion di dato. “Pa saca tur duda, e termino no a implica ningun momento cu actonan fraudulento lo tabata bou di investigacion. Partidonan a termina e acuerdo di trabou den forma mutuo entrante awe” e comunicado ta sigui bisa. “Nos ta gradici sr Ruben Goedhoop pa su trabou, dedicacion y contribucion pa AZV y ta desee exito den su futuro trabou y liderasgzo”. E ultimo ta mas bien un frase comun cu ta uza ora cu dispidi di un persona, despues cu yega na acuerdo. Tabata na juni di 2018 cu AZV a nombra Goedhoop den e funcion aki di director, despues cu e persona tabata traha na PricewaterhouseCoopers, actualmente conoci como Grant Thornton.  

GOLDEN HANDSHAKE

Contrario na raportahe di un otro medio, Goedhoop no a haya un golden handshake. Asina minister di Salud Dangui Oduber a bisa e portal aki. "No, e no a haya un golden handshake. Mi a wordo informa door di RVC cu ningun momento e la ricibi algo cu ta desproporcional y ta den e margen cu ta acceptabel" Oduber a contesta. " Mi ta lamenta cu otro medionan di prensa “kier” crea e impresion cu Goedhoop lo a ricibi un golden handshake cual no ta e caso. Raad y e CEO saliente a yega na un acuerdo mutuo y nos ta convenci cu e director interino sr Jacobs tin e capacidad, conocemento y experiencia pa fungi cono interim director" Oduber a finalisa bisando.