Elmar: Matanan cu a cay riba waya di coriente a causa perdida di coriente durante yobida

ORANJESTAD - N.V. Elmar a atende cu varios problema di suministro di coriente cu a surgi debi na awacero fuerte cu a sorprende Aruba e siman aki, mas concreto, riba  diamars 20 di October, 2020. 

E motibo principal cu a afecta e suministro di coriente den diferente bario riba nos isla tabata debi na e diferente mata nan cu a cay y kibra varios wayanan di coriente. Den algun di e areanan, hasta meternan di coriente a kima debi na e nivel di awa cu a subi y alcansa meternan di coriente di varios cas. 

Total a constata no menos cu 20 meter di coriente a keda seriamente afecta; pues un situacion sumamente peligroso. Pa seguridad di tur hende den e barionan aki, N.V. ELMAR a haya su mes obliga di suspende coriente pa asina trabounan di reparacion por a tuma lugar den un forma sigur. 

Apesar di tur obstaculo cu e tecniconan por a topa cune riba caminda, for di oranan di trempan te cu marduga, varios ploeg a ocupa nan mes, atendiendo cu e diferente storing nan a consecuencia di e awacero fuerte. E storing nan a varia entre fuse nan kima ariba transformernan di alto tension debi na ‘blikseminslag’, meter nan di coriente kima, wayanan di coriente benta abou y fuse nan di cas di clientenan. 

N.V. Elmar su compromiso primordial, desde e prome momento, tabata pa asisti y reanuda suministro di coriente na su usuarionan den un forma sigur, efectivo y mas lihe posibel. Na mesun momento, N.V. ELMAR kier gradici tur su usuarionan pa nan comprension demostra pa cu nan mesun seguridad y esun di e tecniconan durante e situacion repentino di naturaleza cu a tuma lugar e siman aki.