DIP: Plan di Colony tabata pa reactiva San Nicolas y genera trabou pa contratistanan

ORANJESTAD – E idea di reactiva bida na Colony door di e.o. renoba e casnan eyden, tabata uno cu a bin ora cu e periodo di COVID19 a inicia, como un forma pa genera empleo, y alavez duna San Nicolas un boost economico. Asina director di Directie Infrastructuur en Planning (DIP) dr ing Haime Croes a splica noticiacla.com diahuebs mainta. 

E STORIA

Tin un storia of noticia cu a cuminsa circula e siman aki for di seno di partido MEP y despues den e matutino Solo di Pueblo, cu minister Marisol Lopez hunto cu ‘un grupo di sector priva, un grupo local’ kier cumpra tur e casnan aki y converti e bario den un tipo di compleho estilo luhoso manera Tiera del Sol’. Mas aleu a bin compronde cu e noticia cu ta sigui circula, ta bisa cu ta un grupo lidera pa e conocido comerciante Eduardo de Veer c lo ta tras di esaki y cu hunto cu minister Marisol Lopez Tromp, kier logra esaki. 

E PROYECTO

Sr Croes a splica cu ta for di DIP e idea a sali pa, den periodo di COVID19 unda cu cos tabata tranca, haya un forma pa genera trabou, entre otro den seno di construccion y boost e economia. A pensa aki riba San Nicolas, particularmente e casnan p.e di Colony cu ta cay bou di DIP y mester di renoba. E plan concreto segun Croes, tabata pa cera un tipo di consorcio entre contratistanan local di Aruba y hunto, cuminsa e proyecto di renoba e casnan aki, cu despues gobierno por huur of bende cu pueblo, y genera tambe fondo. Croes ta mira esaki como un win win situation, unda cu tur partido ta sali gana. Ademas, unabes cu hende cuminsa huur y of cumpra e casnan, e ta crea un boom na San Nicolas, y e lugar ta haya bida, y ta spin off den mas actividad comercial na e districto ey. Contratista ta haya trabou, gobierno ta haya entrada, y e districto ta haya bida bek. Tur hende ta sali gana. Esey tabata e idea. Lamentablemente nunca e idea a logra lanta cabez y a keda pega.