Minister Lopez no a topa cu premier Wever y lo demanda presidente di Parlamento

ORANJESTAD – Minister Marisol Lopez Tromp lo entrega un ‘contra keho’ contra presidente di Parlamento, pa contra aresta e ponencia di e presidente contra e mandatario en cuestion. Asina por compronde den un carta di tres pagina cu e mandatario a manda pa Prome Minister Evelyn Wever Croes y gobernador di Aruba. Mester considera e carta tambe como un ‘preparacion’ pa un futuro reunion entre e prome minister y e mandatario en cuestion riba e ‘mocion di desconfiansa’ y e situacion crea despues. Te cu diaranzon anochi, ainda e mandatario no a topa cu prome minister. 

E CARTA

Den e carta, e mandatario ta splica e puntonan cu ta referi rond di e suceso for di siman pasa diahuebs ora cu Parlamento a pasa un mocion di desconfianza contra dje y tur loke a sigui despues. Hopi di e puntonan den e carta ta ripiticion di e sucesonan conoci pues. E ta contene entre otro e punto di ‘mocion di desconfianza’, ‘validez di e mocion’,’ miembro ausente durante e votacion’, ‘keho ‘falso’ di Presidente di Parlamento’, y ‘e rumor cu e lo a nombra hende den departamentonan cu ta resorta rond di dje’. Cada punto ta haya un paragrafo of dos, unda cu ta splica cada cos un biaha mas. 

REUNION

E carta a keda entrega na tanto prome minister como gobernador y awor ta spera wak kico ta e siguiente paso. Ta mustra cu e bala ta den tereno di prome minister, cu a ‘priminti’ cu e lo regla e asunto awe mes, y si mester, sin a topa cu e minister en cuestion, door di bay Conseho di Minister y retira su persona pa medio di un carta. E carta ey lo tin cu bay pa Gobernador firma den forma di un landsbesluit pa formaliza e retiro. Unabez cu esey ta cla, dependiendo kico e argumento ta pa e retiro, esta si a uza e mocion en cuestion of otro motibo, e ora e mandatario en cuestion (Lopez Tromp: Red) por cuminsa cana su caminda pa bringa esaki. Por lesa e carta AKI.