Insel Air Aruba ta inicia nan ruta nobo pa Manaus, Brazil diaranson awor

ORANJESTAD - Insel Air Aruba ta inicia nan ruta nobo pa Manaus, Brazil diaranson awor. Den cuadro di esaki, minister di transporte, Otmar Oduber a reuni awe cu gerencia di Insel Air y a indica cu e ta hopi contento cu e desaroyonan di e compania aereo aki. El a indica cu e vuelo inaugural pa Manaus, Brasil diaranson awor ta hopi importante pa Gobierno di Aruba. Ta hopi biaha a papia riba e vuelo directo aki sea pa Manaus of Sao Paulo y na cierto momento lo desea pa tur dos destinacion wordo habri y a hiba e conversacion aki cu gerencia di Insel Air.

PETICION DI GOBIERNO

E buelo aki tabata uno ariba peticion di gobierno di Aruba, y según e mandatario, Insel Air ta cumpli cu e peticion aki, ademas cu e ta bon pa nan mes pa habri e mercado aki, cual ta uno sumamente importante. “Manaus ta un sector di Brasil cu tin ‘feeding’di otro estadonan hopi grandi y amplio. Mi ta kere cu e coneccion aki di Insel cu ta cuminsa cu e vuelonan pa Manaus lo ta sumamente exitoso pa Aruba”. E mandatario a priminti cu Gobierno lo conversa cu ATA pa mira cu e sosten ta wordo brinda na Insel Air.

DESTINACIONAN

Na e momentonan aki Insel Air Aruba ta bulando entre 7 pa 8 destinacion for di Aruba, es decir, nan a crece a base di e plan cu nan a presenta na Gobierno pa crea un hub akinan. Ta trata di un conversacion cu Minister a hiba 4 aña pasa cu Insel, Tiara y Aruba Airlines cu tabata den proceso e tempo ey y tambe cu KLM cu tabata fundamental den esaki. “Awe bo ta mira Insel creciendo, si mi no ta hera 6 avion registra na Aruba cu ta mustra e confianza cu nan ta poniendo, buscando un di 7 avion e aña aki (un MD) y por ta hasta un Fokker 70 mas, haciendo di e flota uno di 8 avion”, Minister Otmar Oduber a duna di conoce. E ta agrega cu esaki ta trece cune cu mester tin e servicionan di aviacion civil cu mester ta cla na tur momento pa ora e ampliacion tuma lugar.