No tin yegada di Sannicolas na Bonaire e aña aki

KRALENDIJK – Entidad Publico Bonaire a dicidi pa no laga yegada di Sannicolas na Bonaire tuma luga e aña aki. Na luga di esey ta bini un programa alternativo digital. For di e aña aki tambe e colo preto di ‘Piet’ ta disparce for di tur yegada oficial di den futuro.

Debi na e reglanan actual pa evita plamamento di e virus di corona no ta posibel pa laga e yegada tuma luga e aña aki. Diputado Nina den Heyer a trece esaki dilanti durante un reunion cu organisadornan di e yegada anual di Sannicolas y e sponsor mas grandi di e evento.

Pa hopi aña caba tin discusion ta tuma luga tocante rol di ‘Zwarte Piet’ durante fiesta di Sannicolas. Esaki tanto na Bonaire como den Reino. Un parti di nos pueblo ta mira rol y apariencia di e pietnan cu colo preto como ofensivo y racista. Tin indicacion hopi cla tambe cu tin mucha cu ta experiencia e periodo aki como no agradabel. Esaki a bini dilanti durante combersacion cu figuranan clave. Colegio Ehecutivo ta haña importante pa tene cuenta cu e opinionnan aki. Ta importante pa organiza un fiesta cu grandi y chikito ta experiencia como positivo y safe. Pa e motibo aki Colegio Ehecutivo ke pa e adaptacion nan y cambionan tuma luga paso pa paso na Bonaire.

Entrante e aña aki colo di e pietnan ta bira otro. E pietnan ta haña diferente color No ta permiti Piet cu colo preto mas durante yegada oficial di Sannicolas na Bonaire. Ta aplica e adaptacion aki den e programa alternativo tambe di e organisacion ‘We Do Entertainment’ cu ta organiza e yegada. Nan ta pensa un alternativa pa tog laga nos muchanan di Bonaire goza di fiesta di Sannicolas. Na e momentonan aki e organisacion ta preparando un programa digital pa Sannicolas. Dentro di poco ta anuncia e programa aki.