Wever Croes: No ta mira un manera factible cu Lopez Tromp por keda den gabinete

ORANJESTAD – Premier Evelyn Wever Croes, aworaki no ta mira un manera factible cu colega minister Marisol Lopez Tromp por keda den e actual gabinete Wever Croes. Asina e prome mandatario a declara diaranzon mainta na radio Top FM den e programa di Hans Geerman.Loke a pasa den Parlamento siman pasa, por a wordo evita, Wever a sigui splica, refiriendo na e debacle cu a tuma lugar ora cu minister Lopez Tromp lo a cambia un decision tuma den conseho di minister riba e tema di spearfishing un dia prome. E situacion cu a wordo crea, a desemboca den un mocion di desconfianza, cu e resultado conoci. 

CONFRONTACION

Premier Wever a sigura di lo papia awe cu minister Lopez Tromp pa sa unda cos a bay robez, y pakico Lopez Tromp a opta pa scoge confrontacion den Parlamento y ‘cherche’ cu e coleganan. Segun Wever, Lopez a tilda parlamentarionan di kier kibra ley, viola tratado, etc. y ta algo cu no ta bon.  

HENTER GABINETE DEN PROBLEMA

Segun Wever, cu e loke cu Lopez a haci, el a hinca henter gabinete Wever Croes den un problema serio. “Paso mi no sa awor un siguiente biaha si nos bay (trata) presupuesto supletorio otro biaha ora cu tin algo di e minister cu tin den dje, kico Parlamento ta bay haci cu ne. Kier men nos tin chens cu nos tin un Parlamento hostil aworaki nan (cu lo por vota ) contra tur loke e minister aki bin cu ne” Wever a sigui bisa.  

SIGUI TRAHA

Wever kier pa minister Lopez splike con e (Lopez:red) por sigui traha asina den un gobierno asina.  Segun e prome mandatario, si tanto Lopez kier keda como minister, e tin cu splica con esey lo funciona aworaki. “E minister (Lopez:red) tin cu splica mi con e la maniobra su mes den e situacion aki” Wever a sigui bisa. “Si mi scucha bon, loke e parlamentarionan a expresa, nan no tin confianza den e minister aki mas, (y) no ta bay sostene nada mas di e minister” Wever a sigui bisa. Y parti di e problema ta cu e ora cu trata e presupuesto supletorio proximamente unda cu tin e.o. e placa di Serlimar (6 miyon plus, cu ta cay bow di e minister ey), tin chens e ora cu Parlamento no ta vota pro e presupuesto completo, djis pa e motibo di e parti di Lopez Tromp. Y esey ta nifica tambe cu no ta bay aproba e presupuesto, pasobra ta un presupuesto completo e ta, y no pida pida. No por aproba e resto sin esun cu ta concerni Lopez Tromp su parti. Y sin e presupuesto aproba, tur cos financiero di e gobierno ta tranca, segun e prome mandatario a sigui splica. Esaki pasobra sin e presupuesto supletorio aproba (presupuesto adapta pa cumpli cu cambionan cu a tuma lugar durante curso di e aña en cuestion), Aruba ta pega y no ta haya placa di Hulanda pa e.o. loonsubsidie y otro cosnan cu ta importante. 

TEMPO

Gobernacion no por keda den un tension asina y como tal e cos (e situacion cu e minister en cuestion) no lo dura mucho mas segun Wever Croes a sigui bisa. E (Wever:red) ta premira cu den curso di awe mes, cos ta keda cla y cu e lo reuni cu e mandatario en cuestion y yega na un solucion, cua cu e por ta. Si tarda mucho, Wever lo bay Conseho di Minister y tuma un decision, sin a papia cu Lopez, cu ta un paso cu Wever lo lamenta pero cu ta necesario. 

NO POR SIGUI TRAHA

Premier Wever Croes a bisa tambe cu aworaki, e no ta mira un manera factible cu Marisol Lopez Tromp por sigui den e gabinete pasobra e lo busca confrontacion cu Parlamento. Y esaki por nifica cu den e proximo reunion, un mayoria por vota contra e presupuesto y e ora ‘cos ta caba’.  E mandatario a cuestiona con Lopez Tromp ta opta pa no papia cu ne, pero si ta bay prensa causa drama etc. Segun Wever, un hende grandi no ta traha asina.