Minister Lopez Tromp no ta descarta pasonan legal pa bringa su retiro ‘ilegal’

ORANJESTAD – Den un comentario breve pa e portal 24ora diaranzon mainta, minister Marisol Lopez Tromp a bisa di no ta descarta pa tuma pasonan legal si e proceso di retiro continua y wordo firma a base di e mocion di desconfianza cu e ta considera ilegal. Ademas e mandatario a bisa tambe cu e intencion enberdad ta pa awe reuni cu prome minister Evelyn Wever Croes riba e tema. E mandatario Lopez ta considera cu e proceso ta canando mucho lento. 

PASO LEGAL 

E mandatario a bisa cu e lo ta ocupa cu e asunto di mocion di desconfianza. Atrobe den su comentario awe mainta, e ta bisa cu e mocion ta uno cu no por a pasa parlamento pasobra no tabatin quorum. Segun Lopez, e la tende e comentarionan di prome minister Wever Croes den prensa, pero ainda no a top’e. “Lo mas importante ta pa manda e mocion, si nan ta kere cu e ta corecto y e ta legal, anto pa fast track e landsbesluit pa su excelencia gobernador pa e ora tin un decision” Lopez a bisa. E ta considera cu e proceso di mocion normalmente ta bay basta lihe pa keda cla pero den e caso aki, e ta tardando, pues casi un siman desde cu e votamento a tuma lugar. 

“Na momento cu esaki wordo considera cu supuestamente lo ta legal, cual mi no ta spera y no por kere, claro cu mi por encamina e caminda ey (legal)” e mandatario a bisa entre otro refiriendo na pasonan legal. Expertonan legal a bisa e portal aki cu cu si cana e caminda legal, mester tene cuenta cu trias politica y cu un huez dificilmente lo por bay tuma un decision y mas bien lo declara su mes no admisible y manda esaki bek pa Parlamento. Lo mas sigur por ta cu lo por exigi un votacion di nobo pa wak si e biaha aki tin quorum y si ainda esnan cu a vota contra lo vota contra e mandatario y si e biaha aki e tin ‘base legal’. NOTA: E potret ta di archivo di noticiacla di e conferencia di prensa di sra Lopez Tromp dialuna ultimo.