ATIA: Gobierno ta enfoca riba cosnan menos importante durante crisis

ORANJESTAD – E gremio comercial Aruba Trade and Industry Association (ATIA) ta sumamente decepciona cu durante un crisis sin precedente, gobierno ta mustra di enfoca riba asuntonan cu kizas den otro tempo lo ta merece su debido atencion, pero na momento cu e pueblo ta bibando den inseguridad di kiko e lunanan cu ta bin ta trese financieramente pa nan, no lo mester ta prioridad.

ATIA a emiti un comunicado dos siman pasa caminda a puntra gobierno riba e varios topico cu enfoke riba planes pa lunanan venidero. Mientrastanto, ATIA a logra comunica cu gobierno y a haya un update riba e negociacionnan cu Hulanda. Lamentablemente, a nota cu aun no tin un plan concreto pa con lo reactiva e economia, salba e companianan cu ta luchando cu e contraccion di mercado, y con lo brinda sosten financiero na e personanan cu ta perde trabou.

Gobierno a anuncia cu loonsubsidie, FASE y e ayudo pa MKB lo sigui te cu December. Esaki sigur ta yuda, pero no lo soluciona e retonan nos dilanti. Pa prome, mester tin un plan cu ta surpasa December; mester perspectiva. Hulanda a aproba e loonsubsidie na e islanan BES te cu Juli 2021, cual ta trese trankilidad den comercio.

Mester duna companianan e derecho pa restructura pa sobrevivi e realidad nobo y pa por garantiza e maximo empleo posibel. Loonsubsidie no ta cubri mayoria di gastonan cu un negoshi tin pa luna. Esey kiermen cu companianan tin lunas ta perdiendo placa y esunnan cu tabatin un reserva, ta agotando esaki. Consecuentemente, hasta cu loonsubsidie companianan tin peliger di haya nan mes obliga di sera porta y manda tur empleado cas. A cuminsa sinti e efectonan di restructuracion forza caba den comercio. Pesey ATIA ta urgi gobierno pa pensa riba un forma di loonsubsidie, caminda por dicidi di pone algun empleado riba FASE y algun riba loonsubsidie y ultimadamente por restructura e compania aunke ta ricibi loonsubsidie. Loke mester compronde y acepta ta cu door di salba un compania, ta salba cuponan di trabou.  Ademas, ATIA y AHATA a sigura cu nan a ofrece gobierno varios sugerencia riba tereno fiscal, cu lo brinda companianan alivio y no lo costa gobierno nada na gasto.  

Concluyendo, ATIA ta reitera e urgencia pa gobierno mustra nan compromiso door di enfoca tur nan esfuerzo na preparacion, comunicacion y ehecucion di un plan cu ta contene solucionnan concreto y especifico pa por sigura cu Aruba ta sali di e crisis aki na e miho manera posibel.