Awacero fuerte a suta Aruba atrobe diamars merdia

ORANJESTAD – Un palo di awacero diamars merdia a laga varios parti di Aruba ‘atrobe’ bou di awa. E tempo tabata pronostica, pero no specificamente manera cu el a cay fuerte entre merdia y 3or di awe tardi. Esey a pone cu toch basta hende a wordo gara pa sorpresa, cu su consecuencia cu esaki por tabatin. Atrobe Watty Vos Boulevard a bira e blanco di critica ora cu atrobe mester a cera parti di dje pa motibo cu e tabata intraficabel, manera potret nan ta mustra. Fuera di esaki, tabatin varios auto cu a pega riba caminda, y casnan cu a yena cu awa. Pero e diferencia ultimo añanan ta cu debi na trabou nan di infrastructura na e lugarnan ‘di custumber’ a pone cu e awa ta ‘disparce’ hopi mas lihe y asina causa toch ‘menos’ molester. Segun servicio meteorologico, aeropuerto a registra mas hopi awacero unda cu a cay un total di 30.8 mm mientras cu na Sta Roza tabatin 14.6 mm y na West Punt apenas 7.5mm. Remarcable ta algun lugar crucial, manera hospital  semper ta bira blanco aunke cu e construccion ta recien. Videonan cu a circula riba rednan social ta mustra e problema cu hospital tabatin cu e situacion di awa. Tambe na e pompstacion na Palm Beach, atrobe tabatin un problema unda cu e awacero a inunda henter e area haciendo esaki intraficabel.