Censo Piloto 2019: Papiamento ta e idioma mas uza na cas

ORANJESTAD - Den preparacion pa Censo 2020, Departamento di Estadistica (CBS) ta informa tocante e resultado di e Censo Piloto haci den e luna di October 2019. Un di e preguntanan cu a wordo haci, tabata  pa scoge entre e dos idiomanan mas papia na cas. E resultado ta mustra cu Papiamento ta e idioma mas uza na cas, sigui pa Spaño, Ingles y Hulandes.

Den mayoria cas ta un idioma ta wordo papia y ta Papiamento so ta wordo papia. Den e casnan cu a indica cu ta papia mas idioma, Papiamento ta e idioma mas uza. Banda di Papiamento, Spaño ta e idioma mas papia, sigui pa Ingles y Hulandes.

For di e Censo Piloto ta sali na cla cu mayoria persona naci na Aruba ta uza Papiamento como idioma na cas, sigui pa Ingles, Spaño y Hulandes. Mayoria persona cu no ta naci na Aruba, tambe ta prefera di papia Papiamento na cas. Esnan no naci na Aruba ta uza Spaño como di dos idioma sigui pa Ingles y Hulandes.

Un mayoria grandi di personanan di nacionalidad Hulandes ta papia Papiamento na cas, sigui pa Spaño, Ingles y Hulandes. Esnan cu no tin nacionalidad Hulandes ta papia mas tanto Spaño na cas, sigui pa Papiamento, Ingles y Hulandes.

Papiamento ta wordo mas uza na cas den e districto di Paradera. Spaño ta wordo mas papia den hogarnan na Oranjestad West. Na San Nicolas Zuid ta papia mas Ingles na cas y Hulandes ta wordo papia mas den cas na Noord y Tanki Leendert.

E Censo Piloto tabata tin un duracion di 10 dia. E teller nan a pasa den e districtonan di Noord, Oranjestad, Paradera, Santa Cruz y San Nicolas. Un total di 2.395 cas a wordo bishita y 6.365 persona a wordo entrevista. E porcentahe nan ilustra no ta suma 100% como cu por a scoge pa 2 idioma.