Analysis: E fayonan cu presidente di Parlamento a comete

For di siman pasa tin e discusion si e loke cu presidente di Parlamento sr. Ady Thijsen a haci durante e votamento pa mocion den e reunion di diahuebs siman pasa (incluyendo esun di mocion di desconfianza), tabata corecto of no. For di Diahuebs, sr. Thijsen ta insisti cu e loke el a haci ta corecto. E realidad ta otro. 

BERAADSLAGING

Loke a sosode ta cu Parlamentarionan a acorda pa cambia e ‘reglement van orde’ pa loke ta trata “beraadslaging”, pero no pa votacion. Durante votacion, lider di fraccion di partido RED Ricardo Croes a anuncia cu e ta bay sali y a sugeri e presidente di Parlamento (Thijsen: red) pa conta cabez pa wak si ainda tin quorum. Ta responsabilidad di e presidente e ora pa sigura cu henter e proceso di votacion (di comienzo te fin) tin mayoria den sala. Entre nan, si votacion (e proceso completo) no tabata conta cu e rekisito di minimo di 11 persona den sala. 

FAYONAN

E proceso di votacion a cuminsa cu mas di 11 pero despues cu AVP su fraccion a bandona sala, RED a anuncia cu e ta bay sali y cu e presidente mester conta cabes. Pero, aki e presidente (Thijsen: red) no a haci esey. Esey tabata su prome fayo. Su di dos fayo tabata pa laga un miembro pafo di sala vota (Howell). Su di tres fayo tabata pa considera cu e mocion tabata valido y a declara esaki aproba.  Cu tur e sucesonan den e forma aki, ta pone cu loke e presidente di Parlamento a haci, ta contra nos constitucion, pa cual t’e votacion, y consecuentemente no por ta valido.