Lopez: Presidente di Parlamento a laga marca voto pro di mocion, di un persona cu no tabata den sala!

ORANJESTAD – Minister Marisol Lopez Tromp dialuna a trece algo dilanti cu ta mustra hopi grave. Segun Lopez, no solamente tabatin un mocion pa cual a vota cu no ta valido, pero e hecho cu durante e votacion aki, presidente di Parlamento sr Ady Thijsen a hasta bay asina leu na laga marca un voto pro di e mocion, di un persona cu no tabata den sala, y cu no a vota. Ta trata di e miembro di parlamento Alan Howell (POR). Noticiacla a tuma contacto cu Howell riba e ‘acusacion’ aki, y su comentario tabata uno cortico:” Bon tardi. No comments!”.  A acerca sr Thijsen tambe, pero te ainda e no a reacciona pa un comentario. 

E PROCEDURA 

“E no tabata presente” Lopez a compronde di e situacion, refiriendo na Howell y a bisa dialuna. E procedura, el a sigui splica, ta cu pa ley e persona en cuestion (den e caso aki Howell) mester ta presente den e sala pa bo por expresa bo voto. “Asina cu bo ta pafor di e sala, bo no por vota, y bo no por tin voto” Lopez a bisa. Como tal ta mustra cu e procedura riba su mes, segun Lopez, tin un fayo den dje. “E voorzitter, bo ta wak riba e video, cu e la pidi e griffier, e waarnemend griffier pa e marca e resultado di e votacion, y tambe e ta marca e resultado di e supuesto voto di sr Howell, cu no ta presente, y esey ta pone cu enbez di ta 10-0, eigenlijk e mester ta 9-0” Lopez a bisa. Ademas, e mandatario a bisa cu e ta considera e situacion algo grave, cu ta trece duda den proceduranan cu mester ta al pie de la letra segun ley. Por scucha e comentario di e mandatario AKI, riba e tema.