ORANJESTAD – Minister Lopez Tromp a duna indicacion cu si dado caso tabatin 11 voto pa e mocion di desconfianza contra dje, e lo tabata un señal pa e baha y e lo a posiblemente hacie. Asina por a compronde di e mandatario dialuna despues cu el a bishita gobernador. “Pero e no ta asina. E ta un mocion invalido y mi no a mira ningun caminda, motibo, feiten, pa retira mi” Lopez a sigui bisa.
PAKICO NO TA CONFIE
Lopez a sigui bisa e portal aki cu e kier pa parlamentarionan specifica concretamente pakico no ta confie. “Kico mi a haci cu ta robez?”. “Kico ta e falta di confianza?” Bo no por lanta mainta bisa un gobernante, djis, mi no ta confiabo, bay bo cas. Pasobra si ta asina, varios a bay caba, ya!” Lopez a sigui bisa.
NO TA BAHA
Tanten cu no tin (un) mocion valido, Lopez Tromp no tin intencion di baha di su funcion, basa riba e mocion di desconfianza cu tabatin contra dje siman pasa diahuebs. E ta cuestiona e validez pa varios motibo, cuminsando cu e cantidad di voto (cu awor segun Lopez, tabata 9-0 y no 10-0, siendo cu e mester ta por lo menos 11-0). Asina e mandatario a contesta Noticiacla.com dialuna despues cu e la sali for di despacho di gobernador. E voto #10 cu lo tambe ta invalido, ta algo cu tambe ta serio, cu e mandatario ta splica den un articulo adhunto.
MOTIBO PA RETIRO
E motibonan cu e parlamentarionan a duna den e mocion presenta, no ta berdad segun Lopez Tromp, y e ta sigui desmenti cu ‘el a tranca of stroba cos’. “Mi ta sinti cu ta buscando porta un motibo pa hala mi of saca mi pa cualkier motibo politico” Lopez a bisa. “Anto e ora berdad, e tin cu culmina den un mocion cu sosten di 11 (voto). Anto si por si acaso tabatin 11 hende na fabor, e ora lo mi bisa, bo sa kico, nan a pidi cu un mayoria, pa mi bay” Lopez a bisa. Segun Lopez Tromp, e no ta compronde pakico tin desconfianza siendo cu algun tempo atras, e partido cu e ta(bata) forma parti di dje a yega na un acuerdo despues di un ‘impasse’ di algun luna. Y nan a sigui traha despues. E la sigura cu si tabatin algo malo cu el a haci, sigur e mes lo a retira. Pero den e caso aki, e ta sinti cu a consecuencia di pasonan cu e la tuma pa remedia cosnan cu tabata bay malo den cierto departamento, a bin problema.
MINISTERNAN CU A HACI MALO A KEDA
E mandatario a bisa algun cos interesante tambe cu ta pone hende pensa. A referi na e hecho cu den pasado tabatin mas minister cu por ta miembronan di Parlamento no tabata contento cu ne, of e partido, of ministernan. Pero e tempo ey no tabatin ningun mocion di desconfianza cu a bin Parlamento pa retira un minister. Tambe e la referi na ministernan cu a haci malo segun Lopez, si a keda sinta y no a wordo kita. Den su caso, e ta sigura cu e si no a haci nada malo y e si nan kier kita.
ORANJESTAD – Actual parlamentario independiente mr. dr. Ryçond Santos do Nascimento ta considera su decision pa subi lista berde AVP como un di su erornan cu e la comete den su bida. Asina e parlamentario a admiti na e periodista Tito Laclé durante e programa Noticiacla LIVE diamars anochi. E ta splica esaki den un fragment di e programa.
ORANJESTAD - Cuerpo di bombero temporalmente tin ekipo nobo di maneho. Por lo menos asina minister di husticia Rocco Tjon a anuncia diaranson mainta riba su pagina di Facebook. Esaki despues cu a manda esun cu tabata na cabes, Emilio Geerman cas recientemente. “Awe mainta nos a reuni cu e miembronan nobo di e management team di brandweer. Esaki mirando e ultimo desaroyonan” e minister a cuminsa na bisa.
WILLEMSTAD – Recientemente durante un conferencia cu a tuma lugar na Corsou, diferente partner di salud mental (GGZ) den e Caribe Hulandes a logra adelanto den nan esfuerso pa intensifica e acuerdo di colaboracion titula ‘Dutch Caribbean Mental Health’ y a expresa nan deseao di formalisa esaki den un entidad huridico. Meta di ‘Federatie Dutch Caribbean Mental Health’ ta pa promove calidad di cuido di salud mental riba tur e islanan den Reino. E federacion lo facilita intercambionan di experticio di contenido y e parti organisatorio. Principalmente riba e tereno di calidad, desaroyo continuo, ley y regulacion y educacion.
DEN HAAG - E siman aki cu Minister Maduro di Finansa ta na Hulanda, e mandatario a reuni cu Presidente di CAFT, sra. Lidewijde van Olerongen. Minister Maduro a duna un update riba e trabounan pa mehora maneho financiero di Aruba y a repasa e proceso pa yega na un miembro nobo pa Aruba den CAFT ya cu e termino di sra. Helen van der Wal ta bay yega su fin na augustus e aña aki. E mandatario a combersa tambe riba e reglanan presupuestario y e maneho cu ta wordo traha pa trata cu surplus, ya cu pa basta aña Aruba a conoce solamente presupuesto cu deficit y awo Aruba ta trahando cu presupuesto cu surplus.
ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.
ORANJESTAD – Ora cu a kere cu awor si ta bay habri frontera cu Venezuela pa e parti maritime, manera tabata indica, dialuna anochi gobierno di Aruba a informa cu un biaha mas ta prolonga e ciere di frontera cu Venezuela, te por lo menos augustus di e aña aki. Frontera cu Venezuela ta cera desde aña 2019, na momento cu Gobierno di Venezuela a cera e frontera unilateralmente. Na mei di 2023 a habri e frontera maritimo basa riba palabracionnan haci entre autoridadnan di Aruba y autoridadnan di Venezuela.