• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Encuesta ultimo ta bolbe mustra un ‘disconnect’ entre pueblo y politica

ORANJESTAD – Tur cos ta mustra cu (los di e hecho si e votacion di mocion di desconfiansa den Parlamento siman pasa ta legal of no) tanto e fraccion POR cu a pone e minister (Lopez Tromp) na e lugar cu e tin, y e fraccion di MEP coalicion (hunto 10 di 11 asiento di e coalicion) no tin confianza mas den dje. Mayoria di 3 mil persona cu a participa den un encuesta di e portal aki ta pensa cu e minister mester keda.  Y segun analista nan, esaki por tin diferente motibo. Y cu e risico cu e contesta lo tabata ‘conoci’ te hasta prome cu e encuesta a wordo haci, e ta mustra un punto interesante, segun analista nan politico cu a papia cu e portal aki. E ta mustra atrobe tambe cu tin un disconnect entre pueblo y politica na Aruba, den sentido cu loke pueblo ta pensa, ta diferente cu loke e politiconan (cu ta suppose di representa e pueblo) ta pensando. Tambe mester pensa cu e (des)confianza den un minister por expande su mes pa henter un asunto di confianza riba henter e gabinete.

MOTIVACION DI E RESULTADO DI ENCUESTA

Entre e splicacion cu analista nan politico a duna di e resultado di e encuesta publica awe mainta, ta mustra cu entre nan, nan (esnan cu a participa den e encuesta) ta mira e loke cu Lopez ta(bata) haciendo, esta trece supuesto iregularidad nan den departamentonan di gobierno na cla, ta algo positivo. Y cu e mandatario mester keda pa por sigui cu e proceso aki di ‘desenmascara’ e iregularidad nan y esnan rond di esaki. Esaki por te hasta nifica, segun e analista nan aki, cu si Lopez retira, cu e por tin consecuencia pa e partidonan actual na mando esta POR y MEP den un proximo eleccion. E por mustra cu e dos partidonan aki a prefera ‘sacrifica’ e minister en cuestion envez cu nan mes wordo sacrifica despues door di e supuesto iregularidad nan di cual algun di nan a wordo ‘tilda di dje’ (y pa cual tin investigacionnan andando). Otro splicacion ta cu simplemente tin un grupo grandi cu ta faborece Lopez y ta sostene no obstante loke tin contra dje. Di otro banda, den un reaccion di prome minister dialuna, tur señal ta mustra cu Lopez no tin confianza, ni di e fraccion cu a pone eynan, ni di fraccion di coalicion. Y si esaki lo a sosode na Hulanda, e minister lo a tuma honor na su mes. 

ADY

Hopi a cuestiona e formulacion di e pregunta di e encuesta pa cu e presidente di Parlamento, mientras cu a splica riba esaki cu ta un hecho cu e votacion tabata haci cu minoria (10 envez di 11 parlamentario, aunke cu a splica e ‘areglo interno’. E contestanan ta duna chens sinembargo pa bisa si e la haci bon of malo y aki esnan cu no ta di acuerdo, eventualmente por vocifera nan pensamento. Algun di e analistanan ta mustra cu durante e encuesta no a presenta e situacionnan ni leynan, pa cual dificilmente un persona por contesta corectamente sin sa e contenido di e acuerdo interno cu Parlamento tabatin. Di otro banda, e presidente di Parlamento a splica tur esaki den medio incluyendo e portal aki y esnan cu a participa, por sali di e punto di bista di a wak esaki y a base di e comentario, opina kico nan ta pensa. Di otro banda, e ta un opinion simple tambe di kico e usuario cu a participa na e encuesta, ta pensa di henter e asunto, sin cu e tin e conocemento di e acuerdo y leynan. Entre comentarionan cu a surgi tambe ta cu e hecho cu e presidente di Parlamento no a actua corecto segun esnan cu a participa, si esaki kier men cu e presidente no merece di sigui como Presidente y /of si e la pone Parlamento den un spot fastioso publicamente. Aki atrobe, e mayoria a vota cu nan no ta aproba, mientras cu esnan cu si ta aproba, tambe a haya nan chens pa vota. 

MAS MINISTER OF NO

E ultimo pregunta a haya un bista cla di kico mayoria (3136 persona cu a participa) ta pensa di e situacion di cantidad di minister. Aki tambe por sali di e punto di bista cu esnan cu a participa, ta contesta basa riba e promesa di e partido MEP di a bin cu 7 minister enbez di 8, mientras cu e realidad a resulta otro. Pues aworaki por remedia esaki. Otronan ta mustra cu e motibo pa cual gobierno a bisa publicamente cu si Lopez lo mester a retira, ta mantene 7 minister so, pasobra e no ta hustifica financieramente pa tin un di 8 minister (mientras cu tin cu paga overbrugging pa tanto e ex minister cu a baha, y awor esaki cu lo por wordo baha). Esaki tambe ta informacion publico pa cual por a scoge e contesta aki, sin cu mester a formula esaki den e encuesta pa e participantenan por dicidi. Hecho ta cu encuesta, aunke no cientifico, ta duna un indicacion si, kico ta biba eyfo, y cu mester tene cuenta cu ne, ya cu e cantidad, ta uno basta participativo.