Encuesta: Presidente di Parlamento a actua robez pa cu votacion mocion di desconfianza

ORANJESTAD – Segun e ultimo encuesta di noticiacla, mayoria di esnan cu a participa, ta conclui cu presidente di Parlamento Ady Thijsen no a actua corecto cu e votacion di desconfianza contra minister Marisol Lopez Tromp. Mes momento, nan ta sinti cu e minister mester warda wak kico ta pasa y despues si resulta cu e ta haya su retiro, mester bringa esaki. Y tambe, e mayoria grandi ta mustra cu si dado caso Lopez Tromp retira of wordo retira, gabinete Wever Croes tin cu bay bek na 7 minister, pues cu un minister existente tin cu tuma e encargo actual di Lopez Tromp over. Un total di 3141 persona a participa na e encuesta cu a cuminsa diasabra y a termina dialuna mainta. 

KICO MINISTER LOPEZ TROMP TIN CU HACI

E prome pregunta tabata ‘kico bo ta kere minister Marisol Lopez Tromp mester haci awor’. Aki mayoria (1645 persona) di 3131 cu a yena e parti aki cu ta 52.56%, a scoge e contesta ‘Warda e decreto di su retiro bin y despues bringa esey.  E siguiente grupo (1377 persona) cu ta 42.99%, a scoge e contesta ‘Tene honor na su mes y retira como minister’. Y finalmente e resto di esnan cu a participa esta 108 (3.45%), a scoge ‘Mi no tin opinion. Los di e hecho cu si e mandatario en cuestion a haya un señal di su fraccion y resto di gobierno, cu no tin confianza den dje, esnan encuesta, ta pensa diferente. Lesa e analisis den un otro raportahe adhunto. 

PRESIDENTE DI PARLAMENTO A ACTUA ROBEZ

Mayoria di esnan cu a participa na e pregunta aki di e encuesta   a mustra nan desaprobacion pa cu e actuacion di e presidente di Parlamento Ady Thijsen. E pregunta tabata “Presidente di Parlamento Ady Thijsen a actua bon door di laga e votacion pa e mocion nan sigui sin mayoria parlamentario presente?”. Aki mayoria (1773 persona di e 3140), a scoge e opcion “No e no a actua bon”, cu ta 56.46%) sigui pa e opcion “ Si el a actua bon”, cu tabata 1275 persona (40.61%) mientras cu e resto di esnan cu a participa cu ta 92 persona (2.93%), a scoge “Mi no tin opinion”.  

CUANTO MINISTER MESTER KEDA DEN GABINETE

E ultimo pregunta di e encuesta cortico, tabata “Si dado caso Marisol Lopez Tromp retira of wordo baha como minister, Gabinete Wever mester mantene 8 minister of reduci na 7, manera tabata e intencion inicialmente”, e contesta tabata uno hopi cla. Aki 3136 a participa di cual un gran mayoria, esta 2748 persona (86.63%) a scoge e opcion ‘Reduci na 7 minister’, sigui pa 208 persona (6.63%)  cu a scoge ‘Mi no tin opinion’, y finalmente 180 persona a scoge pa ‘Mantene 8 minister’, cu ta 5.74%. 

MOTIVACION

Den un articulo adhunto lo publica e analisis di comentaristanan politico, pero por deduci caba cu los di e hecho cu si e minister actual en cuestion Lopez Tromp tin confianza di su gabinete y fraccion, esnan cu a participa, ta wak e asunto diferente. 

RESULTADO

E resultado, manera semper e portal aki a bisa, ta cu e no ta uno cientifico y no ta pretende cu e ta un representacion di e isla completo, sino mas bien di esnan cu a participa. E ta uno di cual e resultado ta anonimo y cu por participa solamente un biaha cu e plataforma cu e usuario a uza.