Wever: Kier papia cu Minister Lopez prome pa wak ‘kico a bay robez’

ORANJESTAD – “Mi a ricibi e motie di Staten y mi mester papia cu e minister prome” tabata e reaccion preliminar di prome minister Evelyn Wever Croes na Noticiacla.com dialuna mainta. Algun rato prome ainda e portal aki a skirbi cu gobierno tabata keto riba e tema. Pero for di e reaccion breve, e minister ta indica cu tur cos ta mustra den direccion cu Lopez tin cu bay, mirando cu e ultimo desaroyonan ta mustra cla den direccion cu no tin confianza den e mandatario en cuestion.

TARDANSA

E portal a raporta algun rato prome dialuna, cu no a tende nada di gobierno y cu esaki ta hopi in usual. Asina mes, e mandatario riba e parti ey, a sigui splica cu e no a alcanza di topa cu Lopez door di compromisonan di entiero y despedida den famia. Manera ta conoci, siman pasa su tio Aiky Croes, conocido comerciante y ruman di tata di prome minister a bay sosega y esaki a tuma e tempo pues di e prome mandatario. 

REACCION

Pa loke ta e reaccion mes, e prome mandatario ta referi na e articulo II.2 di staatsregeling cu ta bisa cu ‘2. Indien een minister het vertrouwen van de Staten niet langer heeft, stelt hij zijn ambt ter beschikking’. “Esey ta bay prome despues di un motie asina” Wever a sigui bisa. “Mi tin cu papia cu e minister prome, pa mi tende di su banda kico a causa e reaccion y mocion di desconfianza di Parlamento. Pasobra e mocion no a bin sin razon” e mandatario a sigui bisa. 

NO TA PROME BIAHA

E mandatario ta mustra cu no ta prome biaha cu e mandatario a wordo yama den Parlamento pa duna un solucion pa un problema. “Segun mi ta 3 of 4 biaha caba cu e ministernan ta wordo yama den Parlamento pa brinda un solucion pa un grupo den comunidad cu kier gana nan pan na forma honra. Si Parlamento yamabo 3 of 4 biaha y ainda bo no tin un solucion, mester tin algo cu no ta bon” Wever a sigui bisa. 

MINISTERRAAD

Ademas, e prome mandatario ta mustra cu hasta tabatin palabracion den conseho di minister, cu e mandatario en cuestion lo no a cumpli cu ne awor. “Principalmente si Ministerraad completo dos dia prome, dus inclusief MinROIM (Minister Marisol Lopez Tromp:red)  a aproba e proposicion pa bay Parlamento” Wever a sigui bisa.  “Mi kier compronde di e minister, si algo a cambia despues, dicon e no a bin Ministerraad bek cu ne of siquiera bin papi’e cu mi prome pa wak si nos por sali afo”, e mandatario a sigui splica.

FALTA DI CONFIANSA

Wever ta mustra e portal aki tambe riba e hecho cu, tin un cos cu ta para firme aworaki, riba tur cos. E confianza cu lo no tin mas. “Mi kier ta bon informa prome cu duna un reaccion. Pasobra los di e discusion riba e legalidad di e mocion, ningun hende por ignora e e hecho cu e fraccion cu a pone e minister den Parlamento no tin confianza mas den e minister. E fraccion mas grandi den coalicion tampoco tin confianza mas den e minister. Esey nan a expresa y vota pe” Wever a sigui bisa. “Ademas, ningun otro miembro di Parlamento a expresa di no ta di acuerdo pasobra nan no a vota contra e mocion, y esaki ta algo hopi serio y nunca bisto” e mandatario a sigui comenta. E ta bisa tambe cu na Hulanda un minister cu no tin sosten di su fractie, ta tene honor na su mes.

CRISIS CU HULANDA

E mandatario a mustra cu aworaki, su prioridad ta Hulanda, y tin cu caba un rato cu esaki prome cu e reuni cu e mandatario Lopez Tromp. “Mientras tanto mi tin man yen cu varios crisis pareu. Negociacion cu Hulanda ta tumando hopi tempo y atencion. Corona crisis y e comportacion di algun hende den fin di siman, y su consecuencianan” e mandatario a bisa. E la pidi tempo como tal, pa e por a duna un comentario mas concreto.