Recordando señor Roy Harms, cu a bay sosega

ORANJESTAD - Aruba a conoce un gran ser humano, yiu, tata, esposo, abuelo y negociante den señor Roy Harms.

Despues cu su mayornan a muda di Brooklyn, New York, bin biba na Aruba, na 1932 Roy a nace.Esaki ta despues di e great deppresion.  Roy a completa su estudio na Juliana school y a cuminsa labora na Aruba Bank. Na 1956 el a cuminsa traha cu su ruman homber na Harms Brothers. Tres aña despues, esta na 1959 el a drenta enlace matrimonial cu Maritza y di e matrimonio a nace 4 yiu.

Na 1989, el a funda Romar Freezone N.V y Romar Trading N.V, nomber cu ta un combinacion di Roy y Maritza. Awendia, e grupo di negoshi aki ta opera na Aruba, Curacao y Bonaire. Ademas di Romar N.V, Roy, cu su aficcion na negoshi, a funda un car delearship conhuntamente cu Moravian Church foundation.

Banda di su negoshinan, e ta un co-fundador di Aruba Nautical Club, miembro activo di comunidad Protestant y co-fundador di Stichting Edmund E. Harms.  Den su tempo liber, e tabata gusta hunga domino, wak un bon wega di baseball, futbol y tennis. Como gran deportista, el a representa su pais como basebolista pa Team Aruba den Caribbean Series, cu a tuma luga na 1953.

Como reconocemento di tur su logronan, tanto como deportista y como comerciante atento pa contribui na su pais, el a ricibi condecoracion Orde van Oranje-Nassau na april 1975.

Roy ta laga atras su legacia di su vision pa negoshi, su pasion pa deporte y ehempel di un bon Arubiano contribuido na su pais. Ademas, e ta laga atras su mas gran tesoro cu ta su famia: su señora Maritza, su yiunan Milton, Belinda y Juliska , su nuebe nietonan y su dos bisanietonan, pa e bay topa cu su yiu Edmund, cu a bay prome cu ne.

Cu señor Roy sosega dushi den brasa di su Creador.