Presidente di Parlamento ta sigui insisti cu votamento tabata legal

ORANJESTAD – E decision di presidente di Parlamento Ady Thijsen pa ‘dal bay’ cu votamento ayera nochi den Parlamento aunke tabatin ‘solamente 10 parlamentario’, ta hustifica. Asina por a compronde di e presidente un biaha mas diabierna mainta. Aparentemente Thijsen a sinti necesidad pa bolbe splica e loke a sosode un anochi prome, ya cu tin hopi segun e, cu no a compronde y lo ta bruhando tera. Ta trata di e votamento e.o. di e mocion di desconfianza contra minister Marisol Lopez Tromp.

BERAADSLAGEN

Segun Thijsen diabierna mainta, partidonan AVP y Red por a scoge pa bandona edificio di Parlamento prome cu Beraadslagingen (deliberacion riba e tema) a caba y prome cu votamento a cuminsa. E ora no tabata quorum y reunion no por a sigui. Pero, Thijsen ta sigui bisa, e proceso di ‘beraadslaging’ a termina y e proceso di votacion a cuminsa. Tanto AVP y Red a keda den sala. Pues reunion por a sigui. Thijsen ta recorda cu el a puntra tin necesidad pa ‘hoofdelijke stemming’ esta votamento pa cabez. “ Aki e contesta e.o. di AVP y Red tabata cu si y no a bandona edificio. Reunion por a sigui”.

STEMMOTIVERING 

Thijsen, segun e mes ta relata, a puntra si tin necesidad pa ‘stemmotivering’ (e motibo pa e voto) y atrobe  AVP ni Red no abandona edificio y a pidi pa stemmotivering. Reunion por a sigui. Pero segun Thijsen, a uza stemmotivering pa anuncia nan salida. Y segun Thijsen, esey kier men cu a vota, y 10 a vota pro y 0 a vota contra y 8 a abstene. E ta recorda cu parlamentario Lampe (AVP) y Lejuez (independiente) no tabata presente, hunto cu uno mas di partido AVP. “Pues resultado mocion aproba cu 10 na fabor y 0 encontra” Thijsen ta sigui bisa na final.