DVG: Campaña di vacuna ta cuminsa y por cuminsa vacuna

ORANJESTAD - Campaña anual di vacunacion contra Influenza ta bay cuminsa y Departamento di Salud Publico ta haci un yamada na e grupo di risico pa pasa busca nan vacuna completamente gratis na un di e localidad nan cu mas ta combiniente.  

Bou di grupo di riesgo nos ta referi na personanan cu ta na risico pa desaroya complicacion grave manera bronkitis y pulmonia pa motibo di griep. E personanan aki ta hende grandi riba 60 aña, mucha bou di 2 aña, personanan cu ta sufri di malesa nan cronico of malesa di nan sistema respiratorio. Tambe personanan obeso, na estado of cu tin un sistema inmunologico abou door di malesa nan manera cancer y HIV.

Aki bou ta sigui un lista di e diferente dia y localidad nan unda nos enfermero nan lo bay ta aplicando e vacuna di influenza. 

Diahuebs dia 22 y 29 di October na Centro Playa Pabou entre 9or y 12or di mainta

Diabierna dia 23 y 30 di October na Centro Curazon Santa Cruz entre 9or y 12or di mainta

Diamars dia 27 di October y 3 di November na Centro di Bario Noord entre 9or y 12or di mainta

Dialuna 2 y 9 di November na Centro di Bario Brazil\ entre 9or y 12or di mainta

Na e localidad nan aki lo vacuna personanan cu ta cay bou di e grupo di riesgo. E personanan aki mester presenta cu nan recept di doctor di cas y nan carnet di AZV. Adultonan mayor di 60 aña mester presenta solamente cu nan carnet di AZV valido.

Es cu no ta cay bou grupo di risico pero kier cumpra e vacuna, esaki no ta posible na e post nan menciona ariba, pero si na seccion di Malesa nan Infeccioso. Es cu kier cumpra vacuna mester haci un cita online via www.dvg.aw . Riba e website lo encontra un link pa por traha un cita pa campaña di vacunacion contra influenza. 

Pa esnan cu enberdad no por traha e cita online por haci esaki tambe telefonicamente via 5224239 of 522424 nos ta informa si cu nos lineanan ta basta ocupa relaciona cu e maneho di e crisis di covid-19. E vacuna tin un costo di AWG 20,- cu por wordo paga unicamente electronico (swipe) no ta permiti placa cash.