Trahadonan di aeropuerto di Aruba ta protesta awe

ORANJESTAD – Trahadonan di Aeropuerto (cu ta cay directamente bou di Aruba Airport Authority NV, ta protesta diabierna mainta 10’or pa un ora. Asina e sindicato FTA a informa e CEO pa medio di un carta, cu e portal aki tin den su poder.  Motibo pa e accion aki ta cu no obstante e hecho cu partidonan ainda ta na mesa di negociacion bou guia di Mediador di Gobierno, AAA ta scohe pa tene un “webinar” den cual lo trata entre otro asuntonan cu ta forma parti di e negociacion andando. 

FALTA DI RESPET

Segun e sindicato, esaki ta demostra claramente un falta di respet di banda di e CEO pa empleadonan, Mediador di Gobierno y e sindicato. Ademas e empleadonan ta considera e postura di AAA, na unda – contrario na FTA cu ta haci esfuerzonan grandi pa yega na un acuerdo – apenas ta wordo desvia di e punto di salida original, incorecto. 

WEBINAIR

E empleadonan den servicio di AAA, tanto miembro como no-miembro di FTA, den forma demostrativo lo no participa na e “webinar” di awe mainta y lo pone trabao abao pa duracion di un (1) ora. “Akinan nos kier enfatisa cu a scohe deliberadamente pa un horario y duracion pa e demostracion cu lo afecta e operacionnan lo minimo posibel. Meta di e accion aki no ta pa perhudica ni AAA como empresa ni tampoco interes general, sino pa duna un señal hopi cla na abo como gerencia cu bo forma di proceder no ta wordo acepta?” e carta ta finalisa bisando. Lesa e carta AKI