Thijsen: E votacion di mocion di desconfianza contra minister Lopez Tromp ta legal!

ORANJESTAD – Presidente di Parlamento Ady Thijsen a sigura e portal aki (noticiacla) cu aunke ta ‘apenas’ 10 persona a vota pa e mocion di desconfianza contra minister Marisol Lopez Tromp diahuebs atardi, e ta valido. Thijsen ta mustra cu desde cu binimento di COVID19, cosnan a bay diferente, unda cu por desvia di reglanan normal di Parlamento. Y esaki ta un di nan. Y den e caso aki, tur e parlamentarionan cu a participa den e reunion di awe na comienzo a bay eens cu e reglanan ‘diferente’. Y esey ta bisa entre otro cu no mester di 11 voto pa un mocion pasa. Ademas, tabatin 18 parlamentario, y cu si tur a keda den sala mes, e lo tabata 10 contra 8 cu ta mayoria. 

NO TA PROME BIAHA 

Ademas, segun Thijsen, no ta prome biaha cu ta vota pa aproba un mocion, sin cu tin e regla di 11 voto. Y segun Thijsen, tanto fraccion di AVP como RED sea a lubida of no tabata sa esaki. Segun Thijsen, si e minister ta sinti cu e decision no ta corecto, e por cana su caminda y bringa e votacion, cu ta den sala di corte por ehempel. 

CRISIS DEN GABINETE

Thijsen no ta considera e hecho cu e parlamentario di Red, Ricardo Croes a vota contra coalicion, un problema pa e gabinete. E no a menciona si esaki ta un crisis, pero a referi (riba pregunta di un periodista) na e hecho cu un parlamentario ta vota segun su consenshi y esey ta nifica cu e por vota contra su partido tambe of coalicion, esta zonder last of ruggespraak. Pues no necesariamente, segun Thijsen, tin un problema awor den coalicion.