Thijsen: Parlamento a aproba mocion di desconfianza contra minister Lopez Tromp

ORANJESTAD – Cu 10 voto na fabor y 0 contra, Parlamento a pasa e mocion di desconfianza contra minister Marisol Lopez Tromp. Por lo menos, segun presidente di Parlamento Ady Thijsen, na final di e votamento, unda cu el a bisa cu ‘e mocion a pasa’. Mester bisa acerca cu tanto fraccion di AVP como RED a bandona sala di Parlamento y e edificio completo como protesta prome cu e votacion, y como tal a no vota. Fraccion independiente Daphney Lejuez tampoco tabata den e sala pues tampoco no a vota. Segun fraccion di AVP, ningun di e votamentonan a sosode den quorum (pa tin quorum, mester tin 11), pues nan no ta valido pues en realidad e mocionan no a pasa. Ademas ta mustra cu Marisol Lopez Tromp mester bay bringa e votamento aki, dependiendo si e ta valido of no. 

AVP Y RED

Prome cu votamento, Parlamentario Arthur Dowers a bisa cu AVP lo no participa na e votamento, pasobra a bin pa trata tiramento di pisca y a resulta cu awor tin tiramento di minister, refiriendo na e mocion di desconfianza cu fraccion di MEP a entrega contra e mandatario. Despues henter e fraccion a bandona e sala y edificio. Lider di fraccion di RED Ricardo Croes tambe a mustra su desaprobacion pa cu e mocion ey y a bisa cu e no ta participa den e wega aki y tambe a bandona e sala y edificio di Parlamento. Pues tanto RED como AVP a abstene di vota. 

VALIDO OF NO

E pregunta awor ta keda si e votamento di e mocion tin validez of no, y esey ta wordo disputa pa tanto e parlamentarionan cu sea a participa na e votamento of no. E noticia ta den proceso. Keda pendiente pa mas informacion.