Boekhoudt: Tur studiante cu Arubalening ta sigura pa compania nobo

DEN HAAG – Tur studiante cu un Arubalening ta sigura entrante prome di januari 2015 pa e compania nobo di seguro InsureToStudy. Gabinete di Minister Plenipotenciario na Hulanda a informa esaki awe mainta. Mes momento nan a informa cu e proceso pa manda e polisnan di e seguro na e studiantenan ta den pleno ehecucion y tur lo wordo manda e siman aki pa e studiantenan. Den e caso cu un studiante tin duda cu si e ta sigura, e studiante por tuma contacto cu e compania di seguro InsureToStudy na e number di telefoon 070 205 1860 of tambe por bishita e website www. arubastudent.com pa aki ‘riba e busca e informacion necesario. Studiantenan cu tin un “basisverzekering” y cu no a logra pa cancela esaki prome cu 31 di december 2014, automaticamente lo keda segura cerca ONVZ pa e aña aki.  

ENCUENTRO INFORMATIVO

Gabinete di Minister Plenipotenciario, ta haya necesario pa organisa na final di januari y comienso di februari encuentronan informativo pa nos studiantenan. Esaki lo tuma lugar pa cada mentor y pa e region di estudio cu nan representa. Meta di e encuentronan aki ta pa duna mas informacion posibel tocante e pakete di seguro y tambe informacion ariba e cam-bio di guia di studiantenan door di mentor. Di e manera aki Gabinete di Aruba ta brinda nos studiantenan e oportunidad pa haci nan preguntanan y ricibi informacion cu ta di importancia pa nan situacion.

CARTA

Den e carta cu e studiantenan a ricibi na luna di december ultimo a haci mencion di un number di telefoon den caso di emergencia, pafor di oranan di oficina. E number di telefoon aki cu ta dirigi pa e grupo di studiante cu tin mas aña ta studia, ta operacional entrante prome di februari 2015. Ariba e fecha aki e grupo di studiante cu tin mas aña ta studia no ta cai mas bou di guia di un mentor, pero directamente bou di e departamento di enseñansa di Gabinete di Aruba.

WEBSITE

Segun e website mes, e ta propaganda cu nan tin un servicio hopi lihe e inteligente pa studiantenan di Aruba na Hulanda. “Nos ta sigura bo estadia na Hulanda durante bo estudio of bo pasantia” e website ta bisa. Ta bisa tambe cu e gabinete di e minister, Arubahuis ta ‘regla bo gastonan medico y e seguro ‘zip’ directamente cu nan.

CASO DI STUDIANTE SIN SEGURO

Mientrastanto NoticiaCla.com a compronde cu tin un caso di un studiante cu tin problema cu su seguro. Segun e partido mas grandi di oposicion na Aruba, esta MEP, un studiante Arubiano na Hulanda cu a bira malo siman pasa no por a haya asistencia medico, pasobra e lo no tin seguro. Ora e la check cu instancianan concerni e la wordo avisa cu minister Michelle Hooijboer a dicidi di cambia e seguro di studiantenan, dun'e na un compania cu 'ningun hende conose', y nada ta regla ainda. Mientras tanto e studiante ey cu a bira malo mester a bai su cas bek, y warda te dia seguro keda cla. Segun relato di e partido, naturalmente su famia na Aruba no por a sinta man crusa, y mester a busca placa di tur forma pa manda Hulanda cu urgencia pa e studiante por haya atencion y cuido medico. NoticiaCla.com no a haya un reaccion ainda di parti di Arubahuis riba e caso aki, pa verifica kico exactamente ta nan version y si ta mas bien un mal comprondemento esaki por ta. E foto ta di archivo di Arubahuis y ta di e yegada di e grupo di studiante di aña pasa augustus.