Gremionan: Crisis di Aruba a cuminsa bay for di man

ORANJESTAD – E situacion di crisis di Aruba ta hopi mas critico cu a spera y a cuminsa bay for di man. Esey ta e mensahe cu gremionan sindical y comercial a haya for di gobernador Refunjol. E informacionnan alarmante ta pone cu awor e gremionan lo bay den nan respectivo seno y despues manda nan cartanan pa esnan responsabel. E mensahe cu e gremionan a manda pa gobernador ta pa urgi tur partido pa sali for di e impasse aki mas lihe cu por.

“Nos no ta politico. Nos ta gremio y nos ta parti di e situacion aki si. Si tur hende pone man na obra nos ta yega na un solucion. Stop di bringa y sali for di e impasse aki” Gina Maduro, papiando na nomber di e gremio sindical a bisa diaranson atardi. Gremio sindicalista SEPPA ta mira cu cos ta empeorando y nan tambe a mustra nan precupacion segun su representante Edmundo Marlin. E inquietud aki ta pone comunidad nervioso cu tur su consecuencianan. “No ta momento pa culpa ken tin falta, sino mas bien con pa sali for di e problema aki” Marlin a sigui bisa.

Gremio comercial ta mustra cu e sindicatonan hunto cu doño di trabou por yega na e consensus riba e crisis actual pa por manda un señal hopi fuerte na esnan encarga cu e presupuesto. Esey ta pensamento di Ronald van Trigt, vice presidente di Aruba Trade and Industry Association. “E ta un situacion precupante, dificil y mas esaki duro, mas dificil e lo dura” van Trigt a finalisa bisando.