Wever: Ex minister tabata pone presion pa Wever haci fabor di impuesto incorecto

ORANJESTAD – Ex minister Tico Croes lo tabata pone presion riba e tempo ey inspector di impuesto Evelyn Wever Croes pa yega na acuerdonan y tarifanan favorable riba tereno di impuesto. Asina actual premier Wever Croes a bisa awe mainta na comienso di su disertacion den Parlamento, tratando tema di e.o. integridad. Wever Croes a referi na un periodo di mas di 20 aña pasa cu e (Wever Croes:red) tabata traha na departamento di impuesto durante su periodo di 9 aña. Y como ehempel di cosnan incorecto, el a usa esaki pa mustra con cos tabata purba bay pero cu no por. Ex minister Tico Croes tabata encarga cu e cartera di Finansas entre 1998-2001, mientras cu Wever Croes a traha como inspector durante e periodo aki pa 9 aña. E tabata traha na Departamento di Impuesto entre 1989 pa 2003.

AYUDO 

Segun Wever, tempo cu e tabata inspector di impuesto e tabata haya yamada di e minister di Finanza e tempo ey, Robertico (Tico) Croes (AVP) unda cu e mandatario lo tabata pone presion riba dje (Wever:red) pa yega na acuerdonan y tarifanan favorable cu no tabata segun leynan vigente riba tereno di impuesto. Tabata pidi pa yuda amigo aki aya, baha impuesto, usa tax holiday etc. Cosnan cu Wever a considera ilegal pues y no a cumpli cu ne.   

REACCION

Den un reaccion cortico mesora pa noticiacla.com despues di su comentario den Parlamento, Wever Croes a sigura e portal aki cu semper el a nenga di coopera cu e mandatario e tempo ey. “Ma nenga di ehecuta su opdrachtnan. Un biaha so e la echt insisti y ma insisti pa e pone riba papel” Wever a sigui bisa. “ Ora el a pone riba papel, mi a hibe corte y klaar was kees” Wever a sigui bisa. E la sigui indica cu e practica aki di e ex mandatario a sosode sigur algun biaha. E portal aki a pidi e ex mandatario (Tico Croes) pa comentario riba e acusacion aki, pero Croes no tabata alcansabel ya cu e tabata duna les (e ta professor na un Universidad na Merca) , pero ta sigui haci e intento. 

E REUNION

Manera cu e portal aki a raporta caba, dos luna y mei despues cu minister Marisol Lopez Tromp y Parlamentario Ricardo Croes a ‘señala’ supuesto ‘mal maneho y iregularidad’ den aparato gubernamental, hasta corupcion, Parlamento a pidi dos minister (Wever y Bikker) pa trata e puntonan aki diamars mainta. Tabata e intencion pa haya claridad di parti di gobierno riba e temanan aki y integridad y ‘bon gobernacion’. Y ta aki ta unda cu Wever Croes a los e ‘situacion’ aki di pasado. E reunion ta continua den Parlamento.