Cas habita na Tarabana destrui pa candela awe mainta

ORANJESTAD – Pa motibo di un bela, un cas na Tarabana a kima di tal forma awe mainta, cu e no ta habitable mas. E cas mes, -situa den Sorsacastraat-, tabata habita pa un señora di edad. E señora a keda transporta pa hospital, unda cu NoticiaCla.com a haya confirmacion cu e lo keda pa observacion pero despues a dicidi cu ta lague bay cas toch. E lo a haya algo di kemadura y tabata den estado di shock. Mientrastanto pa e resto di famia, entre nan e yiu muher, a pidi ayudo di Slachtofferhulp, ya cu e tambe tabata den un estado di shock y yorando hopi, debi na e situacion obvio.

Loke tambe NoticiaCla.com a haya di info, ta cu e cas no ta sigura. Tambe a compronde cu pa motibo cu e dak ta di asbest, tin peliger pa e sitio y cu den curso di awe mes, lo tin cu bin basha e dak abou pa evita mas problema.