AFBA: Preocupa cu varios negoshi no a tene nan mes na regla den weekend

ORANJESTAD - Durante e siman tras di lomba y particularmente durante weekend, Aruba Food & Beverage Association (AFBA) a tuma nota di varios establecimento cu claramente no tabata cumpli cu e reglanan, especialemente e reglanan distanciamento social. Y nan tin miedo cu si esaki sigui, Crisis team por escala medidanan atrobe. Como tal den un comunidad a haci suplica pa cumpli cu tur regla vigente. 

CRISIS

Durante e periodo di crisis AFBA a (y ta) traha(ndo) di serca y den bon cooperacion cu Crisis Team pa establece un protocol cu ta acceptable pa establecimentonan di F&B. E reglanan aki ta conforme cu exigencianan internacional pa por opera durante e pandemia di COVID- 19. Ta importante pa tur establecimento respeta y tene nan mes na e reglanan aki. Falta di cumplimento lo nifica cu medidadanan lo por wordo escala un biaha mas y esaki lo afecta TUR negoshi di F&B un biaha mas. Tur compania a wordo informa y tin conocemente amplio di tur regla y protocol estableci. 

NO TUR A TENE NA REGLA

Apesar di esaki, durante e siman tras di lomba y particularmente durante weekend, por a tuma nota di varios establecimento cu claramente no tabata cumpli cu e reglanan, especialemente e reglanan distanciamento social.

CONSECUENCIA

E ta importante pa proteha e trahadornan, e huespednan local y tambe e huespednan internacional (turista). Aruba ta hibando un campaña publicitario na unda ta propaganda un destinacion safe y un programa extenso a keda introduci pa haci esaki un realidad. Un aumento den casonan di COVID of un brote grandi manera nos a caba di conoce luna pasa lo por nifica cu paisnan clave ta sera nan fronteranan of pone un aviso negativo di biahe pa Aruba of tuma medida cu efectonan negativo pa turistanan cu ta regresa for di Aruba, por ehempel un cuarentena obligatorio.