Caso di apelacion contra ex minister ta inicia januari 2021

ORANJESTAD – Dos aña despues cu huez a dicta sentencia contra dje, y casi 4 aña despues cu autoridad a drenta su cas prome biaha (na 2017), ex minister Paul Croes y 6 otro sospechoso lo ta den corte atrobe pa e apelacion di Caso Ibis. Asina vocero di ministerio publico Ann Angela a confirma dialuna pa noticiacla. Mesora a bisa cu ta trata di e comienso, ya cu e fecha cu corte tin reserva, ta pa 21 di januari 2021 cu ta e regie zitting. Ta determina durante e caso aki ki dia e caso mes mes di apelacion ta tuma lugar.

REGIE ZITTING

E regiezitting, ta unda cu tur esnan envolvi ta presenta dilanti huez, y ta determina e proceso di cana, esta si mester scucha mas hende, si tur cos ta na ordo y si tur cos ta bon, huez e ora ta determina, en concordancia cu e abogadonan, ki dia e caso mes mes di apelacion ta tuma lugar. Esaki por ta algun siman te algun luna despues, pero mas probable no mas leu cu 6 luna. Pues por sali di e punto di bista cu sea den di dos of tres cuartaal e caso di apelacion por tuma lugar. 

KEN TUR TA APELA

Fuera di Croes, tin 6 otro persona cu lo ta den corte pa e apelacion. For di OM, a compronde cu ta solamente 2 pa 3 sospechoso nan kier apela e sentencia, mientras cu di banda di defensa, tin 6 cliente, entre nan Paul Croes tambe. E caso inicial a cuminsa dia 21 di januari 2019, y Croes su defensa tabata riba dia 23 di e luna ey. Na fin, huez a dicta sentencia dia 23 di februari 2019 unda cu entre nan, e ex mandatario a keda sentencia na 4 aña di prison entre otro.