Comportacion di hopi a laga di desea atrobe den weekend nan Aruba

ORANJESTAD – No obstante e constante peticion di autoridadnan, e fin di siman aki, particularmante diabierna anochi, Aruba tabata yena di hende riba caminda. Y cu esaki, e situacionan cu por presenta consecuentemente. Varios accidente, bringamento y buracheria tabata na ordo. Polis tabatin su man yen atrobe, unda cu mester a duna asistencia necesario unda cu varios detencion a cay. Entre nan tambe polis a dicidi di detene varios persona, entre nan un ex minister pasobra e tabata 'hopi cansa', y un turista cu lo a bringa cu su yiu homber. 

LUGARNAN REPLETO

Un cantidad di lugar tabata repleto di hende, unda cu no solamente no tabata bisti tapaboca, pero tambe no tabata cumpli cu e regla di distancia social di 1.5 meter y 4 hende so pa mesa. Tabata parce cu hendenan a fada di ta na cas y a dicidi di sali y bay ‘keiro’, cu riba su mes no ta malo, pero a opta pa bishita un cantidad di lugar nocturno. 

CONSECUENCIAHopi tabata comentarionan cu tabata circula unda cu ta mustra e peliger pa un siguiente brote di e virus, manera cu a conoce na comienso di augustus. Hopi tabata papia di e miedo cu aki dos siman, osea fin di e luna aki, por tin chens pa un siguiente brote. Manera por corda, ta asina e di dos brote a inicia (e di dos wave) ora cu un grupo grandi di hoben durante oranan di anochi na un club nocturno, sin sa aparentemente, a keda contagia y a sigui plama otro pa simanan largo, causando un situacion mas alarmante di COVID19. Danki Dios cu a tuma cierto medida sin resorta na e medida mas crucial cu ta un total lockdown.